Ki pulit jong ka West Garo Hills District kila kem noh 5 ngut ki briew ba donkti ban shoh dusmon bad shoh riewkhlaw ïaka longkmie haka shnong Lower Teksagre, Dadengre jong ka West Garo Hills District hadien ka jingsaphriang jong ka video haki rynsan social media bad ki pulit kila pynthikna ba katei ka jingjia kala jia haka 25 tarik mynta u bnai.
Kum ban shu pynpaw lyngba ki video bala saphriang lah ruh ban sakhi kumba 4 ne 5 ngut ki rangbah kila bom dusmon ïa kawei ka longkmie da ki siej hakhmat u paidbhur, bad naka liang ki pulit mar sien ioh jingtip kila leit ban pynlong ka jingtohkit sha katei ka jaka bad ioh kem nyngkong 2 ngut, ba suba donkti ha katei ka kam bad hadien ka jingtohkit kila pulit kila ioh ban kem sa 3 ngut hynnin ka janmiet bad ïa kitei ki 5 ngut yn rah tian bishar mynta ka sngi.
Ha kaba ïadei bad katei ka jingjia naka liang ka Chairperson jong ka Assembly Committee on Women Empowerment kala pan ruh ka kaiphod na u SP ka West Garo Hills halor katei ka jingjia bad ba dei ban shim da ki lad kiba tyngeh ïa kiba donkti ha katei ka kam bad shen katei ka kynhun kan leit ruh ban kynduh ïa katei ka longkmie ba shah shoh dusmon haka 1 tarik Naitung.
Shuh shuh naka liang ka Meghalaya State Commission for Women kala shim Suo Moto case bad pynrem jur ïa katei ka jingjia bad dei ban pynshitom ïa ki runar ba donkti ha katei ka kam.
