Nongpoh, Lber 12: Arngut ki briew kiba shong ha kawei ka Auto Rickshaw, kaba don ia u number ML-10-A-7293, ia kaba la niah da u Bankerlang Kshiar, ki la mynsaw bad kata ka dei hadien ba katei ka Auto kaba ki shong, ka la shah tynrah ha kawei ka Maruti Alto kaba don ia u number WB-20-B-8521, ia kaba la niah da u Pynhun Marsing.
Katei ka jingjia aksiden, ka la jia hynnin ka janmiet sngi ba-ar bad kaba la jia ha ka por 6:45 baje eiei janmiet, ha kaba katei ka Auto Rickshaw kaba la mih na Saiden ban leit sha Nongpoh bad kaba la don ryngkat bad ki nongleit nongwan, hynrei haba la poi ha Pahamsyiem mar pyrshah bad ka Bethany Hospital, la wan kawei ka Maruti Alto bad kaba la tynrah nadien jong katei ka Auto Rickshaw.
Hadien ba katei ka Auto Rickshaw, ka la shah tynrah ha ka Maruti Alto, arngut kiba shong hapoh katei ka Auto, kiba kynthup ia u Ramjan Ali (27) snem ka rta lem bad uwei u khynnah uba la tip kum u Damewanshwa Khriam (18) snem ka rta, ki la mynsaw.
Tang mar ia tip halor katei ka jingjia, ki Pulit pyniaid kali na Nongpoh, ki la leit mar mar sha katei ka jaka ba la jia ka jingjia aksiden bad kiba la pynkit noh ia kitei kiba la mynsaw sha Nongpoh Civil Hospital, hynrei ia u Damanshwa Khriam, la pynkit noh sha ki jaka sumar kiba kham biang, namar u la kham mynsaw jur.
Haba iadei bad katei ka jingjia, ki Pulit ki la rah noh sha thanad ia katei ka Auto Rickshaw bad kumjuh ruh ia katei ka Maruti Alto. Kumta haba ki Pulit ki la rah sha Civil Hospital ban leh Medical ia ki nongniah, la lap ba u nongniah jong ka Maruti Alto, u la niah kali ha ryngkat ka jingbuaid kyiad.
