Ka jingshah pynngat kyndon ain haduh saw tylli ba la pynngat da ki pulit ka Rynjah Police Station ka long ka bym lah ban pdiang ne ka bym lah ban sngewthuh ki pulit ki don jingmut aiu ban pynngat kyndon ain ia ki nongialam sengbhalang kiba trei na bynta ki jingbha, pynrem ki longkmie haba leit synran ia u Bah Isaac Basawiamoit, General Secretary ka HYC Sengkmie ha ka jingshah khot hajir ha Rynjah Police Station.
Ia u nongialam ka Hynñiewtrep Youth Council U Bah Isaac Basawiamoit la khot hajir mynta ka sngi hadien ba la pynngat kyndon ain haduh saw tylli halor ka jingleit khynra drug ka seng ha ki thaiñ Lapalang, Rynjah, Pohkseh bad kiwei kiwei ki jaka.
La sakhi ruh ia ka jingiasynranlang ha kane ka jingleit khot hajir u tei u nongialam ka HYC da ki nongialam bad ki dkhot ka Seng.
Na ka liang ki katto katne ngut ki longkmie, haba pynrem ia kane ka jingpynngat kyndon ain ia ki nongialam ka HYC kiba trei ban rad dyngkhong ia u drug, ki la ong ba ka jingleh ki pulit ka long kum ka jingai mynsiem bad pynshlur shuh shuh ia ki riew sniew ban nang pynkynrei ia u ne u jait jingdih buaid u ba long u nongshun bakhraw ia ka imlang sahlang khamtam ia ki khynnah samla.
