Nongpoh, Risaw 07: Ka jingkhlad ba kynsan kawei ka Longkmie na ka shnong Umkaduh ha Ri Bhoi District sha ka Shnong Maroit ha ka thain Mairang ba hap ha Eastern West Khasi Hills ka la pynsah umdum ne pynlyngngoh ym tang ia ka ing ka sem, hynrei wat ia ka shnong ka thaw ha kaba ha ka jingleit bud ia la u kurim dang ha ka sngi saitjain bad ha ka sngi baar pat ka la khlad noh ha katei ka jinglut bud ia la u kurim.
Kane ka long kmie kaba la khlad ha ka jingsuba shah pyniap ha u kurim la tip kyrteng kum ka Kong Sperly Syngkli, 27 snem ka rta ka don 2 ngut ki khun na ka shnong Umkaduh ha Ri Bhoi District, hynrei kane ka jingkhlad jongka kaba ym poi pyrkaht satia ka la jia ha ka jingleit bud ia la u kurim ba la tip kyrteng kum u Kursur Mawlong na ka shnong Maroit ha ka thain Mairang.
Kaba pynsuba bad pynglyngngoh ruh ka long ba une u Lok tang hadien ba la khlad la wan rah noh ia ka na Maroit hynnin ka miet bad mynta ka step pat u la phet noh ryngkat kiba haing khlem da ap shuh wat ban pyndep ia ka niam ka rukom kat ka jingkhlad ka lok ruh.
Kumba la iathuh da u Kñi u Bah Mekhal Syngkli bad u Rangbah Shnong u Bah Phaintis Syngkli, la ong ba kane ka Longkmie ka la leit bud ia u Lok ha ka sngi Saitjain ba la dep sha ka shnong jong u sha Maroit, hynrei dei tang ha ka step sngi ba ar kata hadien saw sngi la pyntip ba kane ka longkmie ka khlad noh kaba la pynlyngoh shisha ia kiba haing.
Ki la ong ruh hadien ba la ioh jingtip, ki bahaing bad ka shnong ki leit sha katei ka shnong ban da ka jingthmu ban wan rah noh ia ka met sha ka shnong bad kaba sngewlyngngoh ba ka jingiap kane ka longkmie ka long kaba phylla ha kaba utei u kurim um da kren shai halor kano ka rukom ka la khlad.
Pule ruh: Mynsaw Ka Longkmie Ba Hiar Thma Ki Runar Ba Tuh Ia Ka Mobile Phone
Kaba pynglyngoh shuh shuh ka long ba hadien ba la wan rah ia kane ka Longkmie sha ing hynnin ka miet sngi ba ar na ka bynta ban leh burom khatduh bad une u lok pat ryngkat kiba haing mynta ka step hi ki la mih bad kim ap shuh wat tang ban pyndep ia ka met jong kane ka longkmie, ki la ong.
Ki la ong ruh ha ka jingshisha kat ka jingkhlad ka lok, kum u lok bad kiba haing ki la dei ban ap haduh ban da pyndep ia ka met bad tang ia ka met ruh ym pat pyndep ki la mih noh mynta ka sngi khlem da ap shuh wat ban leh burom khatduh ia kane ka longkmie.
Kane ka jingleh lyndet jong u Lok bad kiba haing ka la pynsuba shuh shuh ba dei ma u, uba la leh ia kane ka kam bad dei halor ka jingsuba shah pyniap la pyntip noh sha ki Pulit ka Ri Bhoi ha kaba mynta ka sngi hi la wan rah noh ia ka met sha Civil hospital Nongpoh ban leh ia ka post mortem.
Peit ruh:
Shuh shuh, ki la ong ruh ba kane ka jingkhlad kane ka Longkmie kum ka ing ka sem ki dap sa ka jingsngewsih kaba khraw bad ki kyntu ruh ia ki bor pulit ba kin tohkit bniah khnang ban tip ia ka jingshisha bad dei tang hadien ba la ioh ia ka report kan dang pynskhem shuh ba kum une u briew dei ban pynshitom bad ban leh da kaba tyngeh katkum ki kyndon ka ain.
