Shillong, Nailur 18: Ka Khasi Students’ Union (KSU) ka pynpaw da ka jingpyrshah kaba jur bad ka jingbym hun halor ka jingleh jong ki Pulit ban wan shim bad rah ïa u Ma Kwilness Suchiang, General Secretary ka KSU East Jaintia Hills District Unit, na la ïing ha ka por shiteng sngi bad rah ïa u sha Sardar Police Station ban tohkit halor ka jingdon bynta jong u ha ka Black Flag Bike Rally kaba la long ha ka 19 tarik u Nailar 2026.
Ka KSU ka kham sngewkhia halor ka rukom treikam jong ki Pulit kaba paw kumba ka pyrshang ban pyniasoh ïa u Kwilness Suchiang bad ki kam pynjulor kiba la jia ha ka 19 tarik u Nailar, tang namar ba u la don bynta ha ka jingduwai bad jingkyrpad ha khmat U Blei shuwa ban sdang ka Black Flag Bike Rally.
Ka KSU ka pynshai kdar ba ka jingduwai shuwa ban sdang ïa ka prokram paidbah yn nym lah ban shim ba don kti ha ki kam pynjulor bad hato ban duwai ruh ka long beain seh? bad ka jingdon bynta ha ka jingduwai hi kam lah ban long ka sakhi kaba pyni ba u briew um don bynta ha kano kano ka kam pynjulor.
Lada ki Pulit ka don ki sakhi kiba biang pyrshah ia kino kino ki briew kiba donkti ha ki kam pynjulor, ka kam jong ka Pulit ka long ban tohkit hok, pynshong nongrim ha ki sakhi, wad ia ki briew kiba don bynta shisha, lum ia ki sabut bad leh ia kaba donkam katkum ka ain.
Peit ruh:
Ka jingiaid bteng ban kynnoh bad khot hajir ia ki dkhot lane ki nongkitkam ka KSU tang namar ka jingdon bynta jong ki ha ka seng, bad ban pynhap ia ki bad kano kano ka jingjia khlem da pyni ia ka jingdon bynta jong ki, kam lah ban long ka rukom tohkit kaba dei.
Ka KSU ka kwah ban kylli: hato ka Pulit ka dang pynleit jingmut shisha ban wad ia ki briew kiba donkti ha ki kam pynjulor, lane ka shu shim ia ka lynti kaba suk da kaba pynshitom ia ki dkhot ka KSU tang namar ba ki la don bynta ha ka jingiakhih paidbah?
Ka bor ban khot tohkit, bat ne kem ia u briew ka wan ryngkat bad ka jingkitkhlieh ban pyndonkam ia kata ka bor katkum ka ain, ki sabut bad ka nongrim jong ka jingtohkit kaba hok.
Ka jingdon jong u briew ha ka rally, ka kyrdan jong u hapoh ka seng, lane ka jingdon bynta jong u ha ka jingduwai shuwa ban sdang ka prokram, kam mut ba u dei u nongkitkhlieh ia kino kino ki jingjia kiba la jia hadien kata.
Ka KSU ka dawa ba ka Pulit ka dei ban jubab shai halor kane ka jingkylli: SHANO KA JINGTOHKIT SHAPHANG KI BRIEW SHISHA KIBA LA DONKTI HA KI KAM PYNJULOR HA KA 19 TARIK U NAILAR?
Ka kamram jong ka Pulit ka long ban wad ia ki nongleh kam bymman bad pynlong ia ki ban ieng hakhmat ka ain, ym ban shna ia ki nongshah kynnoh tang na ka jingiasoh jong ki bad ka seng.
Ka KSU ka pynrem jur ia kaei kaba ka sngewthuh kum ka jingpyndonkam bakla bad khlem da thew ia ka bor Pulit pyrshah ia u General Secretary jong ka KSU East Jaintia Hills District Unit.
Pule ruh: Ba pluh ka Karkhana shna trok, ingkhong lang ki kamram bad dukan die tiar kali ha Byrnihat
Lada ka Pulit ka don ki sabut pyrshah ia u, to pyni ia ki sabut bad ai ba ka ain kan leh ia kaba donkam. Hynrei lada ym don satia ki sabut kiba pyni ia ka jingdon bynta jong u ha ki kam pynjulor, ka Pulit ka dei ban batai paidbah balei ba la leit shim ia u na la ïing bad rah ia u sha thanat ban tohkit.
Ka KSU ka burom ia ka Ain bad ka Rule of Law. Hynrei ka burom ia ka ain kam mut ba ki riewpaid kin shu pdiang jar jar ia kano kano ka jingleh kaba long pyrshah ia ka nongrim jong ka jingbishar hok.
Ka KSU kan ym sngap jar haba ka bor Sorkar, khamtam ka bor Pulit, la pyndonkam ban pyntieng lane ban khanglad ia ka sur paidbah
Ka KSU kan dang ïeng skhem ban iada ia ka Rule of Law, ka hok bad ka jingbishar hok, bad kan ym ailad ia kano kano ka jingpyndonkam bakla ia ka bor Sorkar ban pynskuiñ ia ka sur jong ka jaidbynriew.
