Shillong, Rymphang 27: Ki 58 ngut ki MDC ba la jied thymmai da ki paidbah ha Khasi Hills Autonomous District Council (KHADC) bad ha Jaintia Hills Autonomous District Council (JHADC) mynta ka sngi ki la shim ia ka bynta ban bam smai na ka bynta ban shimti ia ka lyngkor nongialam ne ki nongmihkhmat (MDC) sha kitei ki ïing thaw aiñ ha KHADC bad JHADC.
Ia ka jingpynbam smai iaki 29 ngut ki MDC ka KHADC la pynbamsmai da ka Deputy Commissioner ka East Khasi Hills, ka Kong R.M Kurbah ha Council Hall, Shillong.
Ha kane ka jingpynbam smai, u CEM barim ka KHADC bad u MDC ka UDP na Sohra u Bah Titosstarwell Chyne, u la dei tang ma u, uba bam smai ha ka ktien Khasi bad kiwei pat ha ka ktien phareng.
Ha kane ka sngi, ki 3 ngut ki MLA kata kynthup 2 ngut na ka UDP u Bah Synshar Roy Kupar Lyngdoh na Nongspung-Sohiong bad u Bah Pius Marwein na Langrin bad ruh u Bah Sosthenes Sohtun na ka NPP na Jirang ki la shim ia ka jingbam smai kum kita ki MDC ba la jied da ki paidbah.
La sakhi ruh ha kane ka sngi, ki 4 ngut ki Kynthei ba la shah jied kum ki MDC ha KHADC, kata 2 ngut na ka VPP ba kynthup ia ka Deiti Majaw na Laitumkhrah-Malki bad Aibandaplin L. Nonglait na Mylliem bad ruh ka Kong Grace Mary Kharpuri na ka party NPP na Nongshken bad ka Kong Rona Khymdeit na Nongpoh ki la pyndep ia ka jingbam smai kum ki MDC hapoh ka KHADC.
Ha kane ka kynti, ki 17 ngut ki MDC, ki dei ki khmat thymmai hapoh ka ïing dorbar thaw aiñ ha KHADC ki la pyndep ia ka jingbam smai kum ki MDC ha KHADC ba la jied da ki paidbah.
Haba phai sha Jaintia Hills Autonomous District Council, u Deputy Commissioner ka West Jaintia Hills, u Abinav Kumar Singh, u la shim ia ka bynta kum u kongsan ban pynbam smai ia ki 29 ngut ki MDC ba thymmai ba la jied da ki paidbah.
U CEM ka JHADC u Bah Thombor Shiwat bad ruh ryngkat ki 4 ngut ki CEM barim kata u Bah Hambertus Nongtdu, u Bah Madonbai Rymbai, u Bah Andrew Shullai bad u Bah Moonlight Pariat ruh ki la shim bynta ha ka jingpynbam smai kaba la long mynta ka sngi ha Jaintia Hills.
Kum ban pynkynmaw, ka NPP ka don haduh 14 ngut ki MDC, ka UDP 3 ngut, Congress 3 ngut bad uwei u kyrtong shimet bad ka VPP ka don haduh 8 ngut ki MDC hadien ka jingpynkupbor da ki paidabh ha kane ka election MDC ba dang shu dep.
