Nongpoh, Nailar 14: Kum kawei na ki shlem pule ba la paw ha ka jylla lem bad ha ki jylla Shatei Lam Mihngi, ki bor pyniaid ka Union Christian College (UCC) kaba don ha shnong Umbir Ri Bhoi, mynta ka sngi ki la sdang ia ka jingrakhe ban dap 75 snem katei ka Kolej, kaba la seng ha u snem 1952.
Lah ruh ban kdew hangne, ba ia ka Union Christian College ha Umbir, ka dei kaba la kyrshan da ka North East India Christian Council (NEICC), ha kaba ka jingthmu hi ka long ban kyntiew ia ka pule puthi ki khun samla bad kumba ka long mynta, hapoh katei ka Kolej, ki don shibun ki samla pule na ki jylla Shatei Lam Mihngi bad ki samla kiba nabar ri ruh kumjuh.
Ha katei ka sngi, ba la sdang ka jingrakhe ban dap 75 snem katei ka Kolej, la sakhi da ka jingdon u Bah Prestone Tynsong, Symbud Myntri rangbah ka sorkar jylla kum u Kongsan, ha ryngkat ka jingdon u Dr. Celestine Lyngdoh, MLA Umsning, kum u Symbud Kongsan, nangta u Dr. R.M. Manih, Principal ka UCC, ki nonghikai ha katei ka Kolej, ki samla pule lem bad kiwei.
Haba ai jingkren ha katei ka sngi, u Bah Prestone Tynsong kumjuh ruh u DR. Celestine Lyngdoh, ki la iaroh ia ki bor pyniaid ia katei ka Kolej, kiba la lah ban pyniaid beit pyniaid ryntih bad kaba la pynlong ia katei ka Kolej ba kan long kum kawei na ki Kolej kaba paw ha ka jylla.
Pule ruh:KHADC To Challenge High Court Order To Reinstate Ainam, Financial Report Shows Huge Scam
U Bah Prestone Tynsong, u la ong ba ka sorkar ka kwah bha ban kyntiew ia ka pule puthi ha ka jylla, kata naduh ha ki kyrdan jong ki khynnah rit bad ha ki samla kiba pule ha ki kyrdan bapher bapher.
Peit ruh:Â
Haba iadei bad ka Union Christian College, u Bah Prestone Tynsong, u la ai ka jingkular ba na ka liang ka sorkar kan kloi ban pynioh ia kino kino ki lad jingiarap lada katei ka Kolej ka donkam ha ki liang bapher, ha kajuh ruh ka por, u la ong ba ka sorkar ka kloi ban iarap lada katei ka Kolej ka kwah ban nangpynjanai shuh shuh ha ka rukom ban ai jinghikai ia ki samla kiba pule ha ki lain bapher hapoh katei ka Kolej.
