Nongpoh, Ïaïong 22: U Myntri ka tnad Community & Rural Development (C&RD) ka sorkar jylla, u Bah Sosthenes Sohtun, mynta ka sngi u la pyntip ba ka sorkar jylla ka la shimkhia halor ka jinglong-jingman jong ka Meghalaya House ha Vellore, hadien ba bun ki paidbah ki la pynpaw ïa ka jingeh namar ba ka jingtei ka la rim palat bad ym long shuh ban pynbiang ïa ka jingdonkam jong ki nongleit sumar pang.
Haba kren sha ki lad pathai khubor mynta ka sngi ha Nongpoh u Bah Sosthenes Sohtun u la ong ba u la ioh ban ïakren bad u Myntri Rangbah bad u Symbud Myntri Rangbah ban wad lad na ka bynta ka jingmyntoi ki paidbah, khamtam eh kito kiba leit shah sumar sha Vellore. U la pynpaw ruh ba ki don ki MLA, kynthup ïa u MLA ka North Shillong, bad ki ophisar kiba la pynsngew ïa ka jingsngewkhia halor kane ka bynta.
“Ngim lah shuh ban shu maramot (repair) namar ka building ka la rim palat. Kumta, la dep phah ïa ka proposal ban shna thymmai ïa ka Meghalaya House, kaba yn lah ban don bun kamra shuh shuh bad ban long ka jingïarap kaba khraw ïa ki paidbah ka jylla,” la ong u Myntri d akaba bynrap ruh ba ha katei ka building bala mang ban tei thymmai kin donpalat 50 tylli ki kamra sah.
Haba kylli halor ka jingtyrwa jong u MLA ka North Shillong, u Bah Edilbert Nongrum, u Myntri u la ong ba ka sorkar ka sngewthuh ïa ka jingsngewkhia jong u, bad u la kdew ba ka la don ka jingtyrwa ban noh synñiang T. 50 lakh, hynrei namar ki kyndon (guidelines) jong ka Special Urban Works Programme, kam shah ïa ki MLA ban pynkynriah ïa ka pisa jong ki skhim sha ki projek kiba shabar jylla. Kumta, ka sorkar ka la jubab ïa katei ka jingtyrwa da kaba pynshai ba ka pisa ka dei kaba la mang kyrpang na ka bynta ka constituency jong u MLA.
Shuh shuh, haba ïadei bad ka jingeh jong ki nongpang bad ki nongleit nongwan, ka sorkar ka la pyrkhat ban shim wai shwa ïa kawei ka iing ban pyndonkam kum ka jaka sah shipor. Kane ka jingïaid lynti ka long namar ba ka jingtei ïa ka building thymmai kan shim por kumba ar snem tam, bad hadien kata yn sa pynkynriah noh sha ka Meghalaya House kaba thymmai.