Nongpoh, Risaw 08: Ban tehlakam ne pyrkhing ia ki dribar ba buaid bad kiba pynkheiñ aiñ ñiah kali kiba la ju wan rah ia ki jingjia ba sngewsih ban duh noh ki mynsiem ba kordor, ki Pult ka Ri Bhoi ha ka jingialam u heh  Pulit u V.S Rathore tang hynnn ka miet ba ka la pynlong ia ka jingkhynra ia ki Kali, ki la ioh ban daiñ kuna haduh 8 lak tyngka na ki dribar ba la dih buaid bad ruh kiba pynkheiñ aiñ khlem da bud ia ki kyndon niah kali.

Ha ka jingialam u senior Superintendent of Police ka Ri Bhoi u VS Rathore lem bad ki heh ophisar ha ryngkat ki pulit ki la sdang ia ka jingkhynra Kali naduh ka por 7 baje janmiet bad haduh shiteng synñia ba la kylla tarik na ka bynta ban tehlakam ia ki Kali ba pynkheiñ aiñ bad la pynlong ruh ha ki 3 jaka kata ha Nongpoh, Umsning bad ha Khapmara, ha kaba na ka liang ki Pulit ki la ioh ban dain ia katei ka kuna kaba la kot 8 lak tam tang na ki Kali ba pynkhein ain ba kynthup naduh ki dribar ba la buaid, kiba pynher sted bad ruh kiba pyndait ïitiong bad kiba ym don ia ki kot ki sla.

Kumba la iathuh da u Senior Superintendent of Police ka Ri Bhoi, u V.S Rathore, u la ong ba kane ka jingkhynra ia ki Kali ha kane ka surokbah ka long ban wan rah ia ka jingshngaiñ ki paidbah ba leit ba wan lyngba kane ka surokbah, namar ha kine ki khyndiat sngi bun ki mynsiem ba kordor ki la duh ia la ka jingim tang na ka daw ka jingdon ki dribar ba buaid, ba pynher sted bad kiba ym but ia ki kyndon aiñ ñiah Kali.

U la ong ruh na ka liang ka tnad Pulit kan nym map iano iano kiba pynkhein ain bad ki hap ba leh katkum ki kyndon jong ka ain, namar ka jingjur ka jingjia ba sngewsih ka ktah shisha ba bun ki mynsiem ba kordor ki la duh ia la ka jingim tang na ka daw ka jingbym burom ia ki kyndon aiñ ñiah kali.

Shuh shuh, u la ong ruh ban tehlakam ia kine ki jingpynkheiñ aiñ la donkam ba ka NHAI ruh kan shim khia da kaba buh ia ki CCTV Camera ha ki jaka ba long sor, ban don ki signboard ha  ki jaka ba don jingma (Black Spot) bad ruh ban buh ia ki kynja dak (Rumble Strip) ha ki jaka ba long paidbah ban pynduna ia ka jingpynher sted ia ki Kali na ka bynta ban iada ban lait na ki jingjia ba sngewsih.

Khatduh ruh u la pyntip tang na kane ka jingkhynra Kali ha ki 3 jaka, ki la ioh ban dain kuna haduh 8 lak tam na ki Kali ba pynkheiñ ain, ha kaba kane kan long ruh kum ka jinghikai ba ki dribar bad ki paidbah ki dei ban bud thik pathik ia ki kyndon ban lait na  ki jingjia ba sngewsih bad ruh u la pynthikna ruh ba ka tnad Pulit kan dang bteng ruh ban pynlong ia ki prokram ai jinghikai sha ki paidbah bad ki dribar halor ki kyndon ain ba ki hap ban bud haba niah kali khnang ban iada na shibun ki jingjia ba sngewsih kaba shim ia ka jingim ba kordor jong ki para mynsiem, u la bynrap shuh shuh.