Nongpoh, Nailar 27: Ka Seng Hynñiewtrep National Youth Front (HNYF) Umrit Circle ka la mih shakhmat ban maham syndon ia ki runar kiba ju pynpra ia ka jingker jong ka surok (Railing) bad ruh ia ki Signboard bapher bapher ha ka surok ba pyniasoh na Umrit sha Umdu, ha kaba kane ka wan rah jingma la da pynpra noh ia kitei ki jingker bad ruh ia ki signboard.
Na ka liang ka seng HNYF Umrit Circle ha ka jingialam u Samla Kmen Ranee lem bad ki dkot ki la leit ruh ban jurip ia kane ka surok bad la lap ha bun tylli ki jaka ba ki runar ki la pynpra ia ka jingker nar bad ruh ia ki signboard khlem da burom na ka bynta ka jingshngaiñ ki paidbah ha ka leit ka wan.
Ha kane ka jingjurip ki la lap ruh ba bun jaka, ka khyndew ba twa ka la tuid sha ka surok, na ka daw ka jingbym biang ki Nala um bad kane ruh ka buh jingma ia ki Kali paidbah bad khamtam ki Kali ar shaka ba ki hap ban iaid lyngba ka surok ktieh.
Haba kren sha ki lad pathai khubor, u President ka HNYF Umrit Circle, u Samla Kmen Ranee, u la ong ba ka seng ka sngewkhia ba ki briew kim burom satia ia kaei kaba la shna da ka sorkar kaba long ka jingmyntoi ki paidbah bad ym lah ban tip la ki tuh ne ki shu pynpra ia kitei ki jingker bad ki signboard ba la buh khnang ban shngaiñ ki paidbah ha ka leit ka wan.
U la ong ruh ba ka seng HNYF Umrit Circle ka maham ia ki briew ba pynpra ia ki signboard bad ki jingker bad lada ka lap nangne shakhamt kan leh da kaba tyngeh.
Shuh shuh, ha kawei pat ka bynta, u la buh ruh ka jingkyrpad na ka tnad PWD ba kan jurip ia kitei ki jaka ba twa khyndew bad la hap khyndew sha ka surok bad ban maramot ia ki katto katne ki bynta ba la sniew ka surok bad ruh ban shna bha ia ki nala um, khnang ba ki paidbah ba leit ba wan na ka thain Ri Bhoi Sepngi kin shngaiñ bad kin lait na kino kino ki jingma ha ka leit ka wan lyngba kane ka surok, u la bynrap.
