Shillong, Nailar 26: All Khasi Meghalaya Tourist Taxi Association (AKMTTA) hynne ka sngi ka la pynlong daka jingiakhih kaba shong kyllain mungor ha Khyndai Lad.
Kane kadei ban pyrshah iaka Policy bala pynmih daka Sorkar Jylla ban shah iaki kali bad ki ar shaka ki riew shimet ban kamai hadien bala Register bad ioh jingbit naki District Transport Officers (DTO).
Ha kane ka jingiakhih shong kyllain mungor la wan kyrshan lang daka Meghalaya Commercial Truck Owners and Drivers Association (MCTODA) bad ka seng HITO.
Haba kren shaki lad pathai khubor u President ka AKMTTA u Bah Recaldinus Dohling ula ong ba wat hadien ar snem tam ba ka Association kala pynsngew shaka Sorkar Jylla ban wanrah daka Policy ban khanglad iaki kali bar Jylla ban kit iaki nong jngohkai pyrthei sha ki jaka jngohkai (Tourist Spot) ha kylleng ka Jylla hynrei haduh mynta ia Sorkar ka dang sngap mynthi.
U Bah Recaldinus ula ong baka Association kala dawa naka Sorkar ban khanglad ia ki kali kiba na bar jylla ban rung sha Tourist Spot kiba don hapoh Meghalaya, daka ba pyntreikam daki jaka khnang ba ki kali bar Jylla kin pynieng lada ki wankit briew (Tourist) na kiwei pat ki Jylla.
“Haba iadei bad kane ka jingdawa, ka Association bunsien kala ioh ban ia kynduh bad ka Sorkar Jylla hynrei ka jubab kaba ngi ioh ka shu kut tang ki saw kynroh khlem da pyntreikam ia ki bad ka jingiakynduh ka long tang ban ioh ia dihsha” la ong u Bah Recaldinus.
U President ka Association ula ong baka jingdawa kadei hi baka Sorkar Jylla kan shna daka Policy ba tang ki kali Tourist trai Jylla, ki ba dei hok ban ialam ia ki nongjngohkai pyrthei (Tourist) sha kylleng ki jaka jngohkai pyrthei (Tourist Spot) kiba don hapoh Meghalaya.
U la ong ba lada ka Sorkar Jylla ka dang sngap mynthi ka Association kan sa pynbna pat daki jingiakhih kiba tyngeh haki sngi ban wan.
