Ka Euro Cup 2024 ka la poi noh sha kaba kut bad ka jingiakhun phainal ne ban knieh ia kata ka nam lahduh ne ka ri kaba khlain ha ka phutbol ha Dewbah Europe kan long hapdeng ka England pyrshah ia ka Spain, ki ban sa iakhun shibit ka shiteng miet por 12:30 (IST) jong ka 15 tarik ha Olympiastadion ha Nongbah Berlin.
Khyndiat haba phai halor ka jingiaid lynti jong kitei ki ri haduh ban da poi sha ka thong ban knieh syndon ia ka nam lahduh, ka long ba ka Spain ka dei kaba don ha ka Group-B bad kaba la jop baroh ki jingiakhun ha ka Group Stage, katba ka England ka dei kaba don ha ka Group-C, ha kaba ka jingiakhun jong ka England ha ka Group Stage, ka long ba ka jop shisien bad iakhaid arsien, kata shwa ba kan rung sha ka Round-16.
Ha ka Round-16, ka England ka la jop ia ka Slovakia da 2-1, katba ka Spain ka la jop ia ka Georgia da 4-1 bad ki sa ioh ban rung sha ka Quarter Final.
Ha ka Quarter Final, ka England ka la jop ia ka Switzerland da 5-3 ha ka jingiakhun kaba la poi sha ka Tie Breaker, namar ha ka jingiakhun jong ki 90 minit bad kaba la rah wat shaduh ka Extra Time ka jingiakhun, ka la kut ha ka jingiakhaid kaba 1-1. Katba ka Spain ka la pynliem ia ka Germany da 2-1.
Ha ka Semi Final, ka England ka la pynliem ia ka Netherland da 2-1, katba ka Spain ka la pynliem ia ka France da 2-1.
Khyndiat halor ki player, ka dei ka jingshisha ba kitei ki ri kiba la poi sha ka phainal, ki don ia ki rangialehkai ba kynsai eh ha ka pyrthei, ka England ka don ia ki rangialehkai shakhmat kiba tbit, kiba kynthup ia u Harry Kane, Bukayo Saka, u Phil Foden, u Cole Palmer lem bad kiwei. Ha ki bynta ba shakhmat ka don ia u Jude Bellingham, u Kobbie Mainoo, u Declan Rice, bad kiwei. Ha ki bynta ba shadien, ka don ia u Harry Maguire, u Kyle Walker, u Luke Shaw, u Kieran Trippier lem bad kiwei.
Katba haba phai ia ki rangialehkai ka Spain, ha ki bynta ba shakhmat ka don ia ki rangialehkai ba kynsai eh bad khamtam u Lamine Yamal, uba dei u rangialehkai ba dang rit ka rta hynrei u dei pat uba tbit bad ba baroh ka pyrthei ka tip bad sakhi ia ka jingtbit jong u ha ka phutbol, nalor u Yamal, sa u Nico Williams, Alvaro Morata bad u Dani Olmo, ki ban sa pynkhihwin ia ki rangapdien ka England.
Ha ki bynta ba shapdeng, ka don ia u Gavi, u Rodri, u Fermin Lopez lem bad kiwei. Katba haba phai sha ki rangapdien, ka Spain ka don ia u Marc Cocurella, u Dani Carvajal, u Nacho, u Laejandro Grimaldo bad kiwei.
