Ka Tynring Sports and Games Association ryngkat ka jingsnohkti lang bad ka Seng Samla Shnong Tynring ka la pynkut noh ia ka Open to All Knockout Football Tournament ha Madan Football Tynring.
Ha kane ka sngi pynhap pyrda, la wan ban don bynta lang u Bah Shakliar Warjri uba dei u myntri badei khmih ia ka tnad sports kum u kongsan, u bah Pyniaid Sing Syiem CEM ka KHADC ba dei ruh u MDC ka thaiñ kum u symbud kongsan, Bah Wardington Nongrum Sordar ka Tynring, ki nongïalam shnong, ki seng samla, ki dkhot jong ka Tynring Sports and Games Association bad ki paidbah.
Ka jingïakhun phainal ha katei ka sngi kala long hapdeng ka Charger F.C pyrshah ïaka KDR F.C ha kaba ka KDR F.C ka la iohrah syndon ïa ka nam lahduh hadien ba kala lah ban pynliem ïa ka Charger F.C da 1-0 kol kaba la thep da u Rijied Sun ha ka minit kaba 7.
Haba kren ha kane ka sngi, u CEM u la ai khublei ïa ka Tynring Sports Club kaba la pynlong ia kane ka tournament ban sei kyrpang ia ka sap ka phong ki samla kiban iakhun ha ki tournament kiba heh bad u la pyntip ba ladep ban ai 10 lak tyngka ban pynbit pynbiang ia ki toilet bad ki dressing room bad nalor kane u CEM u la ai sngewbha 1 lak 50 hajar tyngka na ka bynta ki khusnam.
U myntri haba ai jingkren u la ong ba kum u myntri badei khmih ia ka tnad sports, ka dei ka kamram jong u ban kner ia ki kti jingiarap na ka bynta ban kyntiew ia ki jinglehkai bapher bapher bad ka jingiatreilang kan long ka jingsarong ia ka jylla lada ioh ia ka jingjop bad na ka liang u myntri u la noh synniang 1 lak tyngka sha ka Tynring Sports Club.
Ha katei ka sngi la sam ruh ïaki khusnam sha ka kynhun kaba jop bad kumjuh ruh kaba la shah rem haka jingïakhun phainal.
