Ka President jong ka ri India, ka Droupadi Murmu kala thung da u MLA bad MP barim ka jylla Karnataka, u C.H. Vijayashankar 67 snem ka rta kum u Lat ba thymmai ka jylla Meghalaya hadien ba ka President ka ri India kala pynbna bad pynmih hukum ïaka jingpynkynriah kam ïaki lat jong ki jylla bapher bapher.
Une u MP ar sien na Mysuru, u la bat ruh kum u Myntri ka sorkar pdeng bad u dei ruh u dkhot ka Karnataka Legislative Assembly naduh u snem 2010-2016 bad u la don ka jingïaid lynti ha ka saiñ hima sima, ha kaba u la mihkhmat ïa ka BJP bad ka Congress.
U Vijayashankar uba la iehnoh ia ka BJP ha u snem 2017 u la pyniasoh sha ka Congress ha u snem uba bud. La pynieng ia u kum u kyrtong synrop ka Congress-JDS ha ka elekshon Lok Sabha 2019 na Mysuru da ka tiket Congress. Hynrei u la shah rem noh ha u kyrtong ka BJP u Pratap Simha da palat 1.38 lak vote, hynrei u Vijayashankar u la wanphai biang sha ka BJP ha u snem 2019.
