London, Jymmang 28: Ka kynhun ialehkai phutbol ka India ka la shah pynliem noh da 2-0 ha ka kynhun ialehkai ka Jamaica, ha ka jingiakhun na bynta ka Unity Cup, kaba la long ha London.
Katei ka jingiakhun hapdeng ka India pyrshah ia ka Jamaica, ka dei kaba la long ha shiteng miet ka 27 tarik bad kiba la iakhun ha Valley Stadium ha London.
Haba phai ha katei ka jingiakhun, ka Jamaica ka la ioh ia ka kabu ban pynkhih jar nyngkong ha ka minit ba 8 ka kylla step, ia kaba la ioh ban thep da u Reggae bad kiba la pynkut ia ka kylla step da 1-0.
Ha katei ka jingiakhun, ka dei ka jingiakhun kaba iakhaid bad ki rangialehkai ka India, ki la lah ban pynpaw ia ka sap ialehkai kaba tbit pyrshah ia ki rangialehkai ka Jamaica, kaba dei ka ri kaba don ha ka kyrdan ba 70 katkum ka FIFA Ranking.
Katba ka jingiakhun ka dang iaid shakhmat, ka kynhun ialehkai ka Jamaica, ka la ioh biang ia ka kabu ban pynkhih jar ha ka minit ba 78 ia kaba la thep da u Kaheim Dixon bad kaba la pynlong syndon ia ka India ba kan shah rem noh da 2-0.
Lyngba katei ka namrem hakhmat ka Jamaica, ka India kan sa iakhun pyrshah ia ka Zimbabwe ha ka 30 tarik mynta u Bnai, na bynta ban iaknieh ia ka kyrdan balai ne Third Place.
Kum ban shu kdew hangne, ba ha kane ka kynti ba ka kynhun ialehkai phutbol ka India ka la leit ban shim bynta ha katei ka lympung ialehkai, la don bynta ruh u Ricky Shabong, u samla Khasi bad uba lehkai na ka Punjab FC ha ka Indian Super League.
Sa Peit Ruh
