Nongpoh, Jylliew 28: Shibynta ban kyntiew ia ka jingialehkai Kriket hapoh ka Distrik bad khamtam eh ha kito ki thain nongkyndong, mynta ka sngi ki nongialam ka Ri Bhoi District Cricket Association (RBDCA), ki la hiar sha ka shnong Patharkhmah bad kata ka long ban pynskhem ia ki nongkitkam jong ka Western Ri Bhoi Cricket Development Unit (WRBCDU), khnang ba kin ïoh ban trei ha ka ban kyntiew ia ka kam ialehkai Kriket ha katei ka thain.
Ha katei ka sngi la wan ban pynskhem ia kitei ki nongialam ka WRBCDU da u Bah Rayonald Kharkamni, President ka RBDCA, bad ka dei ruh ka sngi ba la pynkut noh ia ka lympung ialehkai Kriket kaba la tip kum ka ‘2nd Western Ri Bhoi Cricket Tournament’ ba la pynlong ha madan Western Ri Bhoi.
Khyndiat haba ai jingkren ha katei ka sngi, u Bah Rayonald Kharkamni, kum u President ka RBDCA, u la pynpaw ia ka jingkmen ba u ïoh ban iashimbynta ha katei ka lympung, kaba long kum ka jingai mynsiem ia ki nongpyniaid ia katei ka lympung ialehkai Kriket, khnang ba kin nanglah shuh shuh ban pynleit jingmut ha ka kam ialehkai Kriket.
Haba u kren ia kitei ki nongialam ka WRBCDU, u Bah Rayonald Kharkamni, u la kyntu ia kitei ki nongkitkam ba kin iatreilang bad ki RBDCA, na bynta ban kyntiew shuh shuh ia ka kam ialehkai Kriket bad khamtam eh ban shimkhia na bynta jong kito ki heprit kiba dang rit ka rta, namar ban kyntiew ia kano kano ka kam ialehkai, ka donkam ban shimkhia naduh ba dang rit ka rta.
Khyndiat haba phai ha katei ka lympung ialehkai Kriket, ka Rani Police Out Post, ka la ïoh ban rah ia ka nam lahduh bad kata ka dei hadien ba ka la lah ban pynliem noh ia ka Patharkhmah Cricket Club da 2 Wicket.
Ka jingialehkai ha katei ka sngi, ka long ba ka Rani PO ka la jop ia ka Toss, hynrei ka la ailad ia ka Patharkhmah CC ba kan tied nyngkong, ha kaba ka Patharkhmah CC, ka la tied 82 run ha ki 15 over. Haba beh ia katei ka thong kaba la buh da ka Patharkhmah CC, ka Rani PO ka la lah tied 83 run na ki 14.4 balls bad kaba la pynthikna ban long kum ka lahduh ha katei ka lympung ialehkai Cricket.
