Jylliew 04: U Ricky Shabong, u rangialehkai phutbol na Meghalaya bad uba lehkai na ka Punjab Football Club ha ka India Super League, u la shah jied ban mihkhmat ia ka India ha ka jingiakhun ka FIFA Men’s Friendlies, ba ka India kan iakhun pyrshah ia ka Tajikistan.
Lah ruh ban kdew hangne, ba dang shen, u Ricky Shabong, u la shah jied ban mihkhmat na ka kynhun ialehkai phutbol ka India, ha ka por ba ka India ka leit iashimbynta ha ka Unity Cup kaba la long ha England, ha kaba u Ricky Shabong, u la ioh ban mih madan ha baroh ki 90 minit, kata ha ka jingiakhun ka India pyrshah ia ka Zimbabwe.
Ka jingshah jied u Ricky Shabong ban mihkhmat na ka India ha ka jingiakhun pyrshah ia ka Tajikistan ha ka FIFA Men’s Friendlies, ka la long ka burom ia ka jylla bad kaba pynpaw pyrthei ruh ba ka jylla Meghalaya, ka don ia shibun ki rangialehkai kiba tbit ha ka jingialehkai phutbol.
Ka jingiakhun ba nyngkong ka India pyrshah ia ka Tajikistan kan dei lashai ka 5 tarik bad ka jingiakhun ba-ar kan dei ha ka 9 tarik mynta u bnai, ki ban sa iakhun ha Hisor Central Stadium, Tajikistan.
Sa peit ruh
