Ka jingkmen kaba khraw ka la wan biang hapdeng ki nongshong shnong kiba ieid ia ka kam ialehkai kriket ha ka ri India, hadien ba ka kynhun ka ri India ka la ioh ban rah ia ka nam lahduh ia ka T20 World Cup 2024 ha ka sien kaba 2 da kaba pynliem noh ia ka kynhun jong ka South Africa da 7 run, hynrei hapdeng ka jingkmen jong ki palat lak ngut ki nongshong shnong ka ri, hynrei la pynsahnud pat ia ki hadien ka jingmih ka khubor ba ki ar ngut ki khlur ialehkai kriket ka ri India ki la rai ban shongthait noh na ka rynsan ialehkai kriket T20.
Kine ki khlur ialehkai kriket kiba kynsai ka Ri India kiba la rai ban shongthait noh, ki kynthup ia u kapten ka ri India u Rohit Sharma bad u Virat Kohli kiba dei ki rangialehkai kriket bna nam na ka ri kiba la lah ban ai sngewbha ia ka ri India da ka jingjop kaba 2 ha ka lympung ialehkai kriket jong ka T20 World Cup 2024 kaba dei ruh ka sien kaba ar ia ka ri India ban khur ia ka nam kum ka lahduh.
Lah ban kdew hangne, ba u Rohit Sharma u ba la ialam ia ka kynhun ka ri India ha ki lympung ialehkai kriket (International Format) u la mihkhmat haduh 159 tylli ki T20 internationals tournament bad hashwa ba un shim ia ka rai ban shongthait noh na kine ki lympung, u la ai sngewbha ia ka ri India da ka jingtreishitom ban pynioh ia ka nam lahduh ha ka sien kaba 2 ia ka ri ha ka T20 World Cup 2024 kaba la shimpor kumba 11 snem ban ioh biang ia kane ka takma kum ka lahduh.
“Khublei Shibun Rohit Sharma kum u Captain bad ia u Virat Kohli ki nongtied ba kynsai ka ri India ia ki jingtreishitom ki jong phi ban ialehkai bha ha ka rynsan ialehkai kriket bad ki jingaiti met bad mynsiem ban rah ia ka nam jong ka ri India ha ki lympung ialehkai Kriket bapher bapher”, tuid ki khubor jingai khublei kyrpang na kylleng ki jaka ka ri India bad na ki riew ieid ia ka kam ialehkai kriket ha India.
