Guwahati, Jylliew 15: Ka long ka khubor kaba kmen bad kaba yn ai jingkyrmen ia ki phew lak ngut ki nongshong shnong ka jylla Assam, hadien ba u Myntri Rangbah ka jylla Assam u Dr. Himanta Biswa u la leit ban plie noh ia ka jingsdang ban pyntreikam ia ka Namrup Thermal Power Station kaban ai jingshakri lyngba ka jingsam bording sha ki phew tylli ki shnong ha ka jylla Assam.
U Myntri Rangbah ka Assam, u Dr. Himanta Biswa Sarma u la iathuh, ba lyngba kane ka Project yn lah ban pynmih haduh 25 MW solar power project, ia kaba yn tei ha ka jinglut kaban kot kumba Rs 126 klur tyngka, ban pynieng ruh ha ka jaka kaba don kumba 108 acres bad la kyrmen ban pyndep ia kane ka project hapoh ka 18 bnai.
U Himanta Biswa, u la iathuh ruh, ba ar tylli ki Solar Power Project kaban pynmih bording haduh 1000 MW ia kaba la pynieng hapoh Karbi Anglong District bad 120 MW la tei ha Dimahachao District yn sa plie paidbah noh shen ha ki sngi ban wan kaban long ka jingkyrkhu ia ki paidbah nongshong shnong jong kine ki ar tylli ki District.
Shuh shuh ruh, la iathuh, ba ka Namrup Solar Power Project kan long shisha ka jingmyntoi ia ki paidbah nongshong shnong ka jylla Assam ban pynbit pynbiang ia ka jingsam bording ilektrik lyngba ka jingshit jong ka sngi bad ruh shen yn sa pynioh bording ruh katkum ka jingdonkam ki paidbah hapoh Dibrugarh ha ki sngi ban nang wan.
YN MYNTOI KI PAIDBAH KA ASSAM NA KA THERMAL POWER SOLAR STATION/ BUH MAWNONGRIM U CM IA KA PROJECT BA KOT 126 KLUR
