Shillong K’lyngkot 23: Haba kren sha ki lad Pathaikhubor mynta ka sngi ha Nongbah Shillong, u Bah Lahkmen Rymbui, Myntri ka tnat pule puthi ha ka sorkar jylla, u la ong ba u la dep kren bad kyrpad ia u Prof. Sumarbin Umdor, ba un bteng ia ka kam ban long kum u Pro Vice-Chancellor ka North Eastern Hill University (NEHU), da kaba kdew ruh ba ka shithi iehnoh jong u Prof. Sumarbin Umdor, kaba u la phah ha ka 15 tarik u Nohprah jong u snem 2025, na ka liang ka tnat pule puthi kam pat pdiang satia.
“Nga la kyrpad ia u Prof. Sumarbin Umdor, ba un bteng biang ia ka kamram, khnang ba ki kam ki jam hapoh katei ka skulbah NEHU Nongbah Shillong, ba kin long kiba iaid beit iaid ryntih, namar kumba ka long mynta na ki huri hura hapoh katei ka skulbah, ka la ktah ia ka jingiaid beit ka jingpule bad ruh ka rukom siew bainong sha ki nongtrei ha katei ka skulbah” ong u Bah Lahkmen Rymbui.
Ka jingkren jong u Bah Lahkmen Rymbui, ka la mih ka dei hadien ba dang ha kine ki khyndiat sngi, ba ki samla pule ha NEHU, kiba kynthup ia ka NEHUSU, KSU-Unit, NEHUNSA bad ka NEHUTA, ki la leit ban kynduh ia u Conrad K. Sangma, Myntri Rangbah ka sorkar jylla, ha kaba lyngba katei ka jingleit kynduh, ki la kyntu ia ka sorkar jylla ba ki dei ban tuklar bad leh eiei halor ki huri hura kiba don ha NEHU bad khamtam eh halor ka jingpep trei kaba 422 sngi jong u Prof. Prabha Shukla, uba dei u Vice-Chancellor ka NEHU.
Halor ki huri hura ha NEHU, ka sorkar jylla ka la iakren bad ka sorkar kmie, na bynta ban weng bad ban pynkut noh ia baroh ki kynrum kynram kiba don ha NEHU, la bynrap u Bah Lahkmen Rymbui.
Shuh shuh, u Bah Lahkmen Rymbui, u la ong ba lada ym don Pro Vice-Chancellor ha NEHU Shillong, kan sa wanrah ia ka jingshah ktah kaba bun, kata la ka long naduh ha ka pule puthi lem bad ia shibun, nalorkata kan sa ktah ruh ia ki 70 ki College ha ka jylla bad kiba la pyniasoh bad ka NEHU.
Namarkata, katba ym pat lah ban pynbeit lut ia baroh ki kynrum kynram, nga kyrpad ia u Prof. Sumarbin Umdor, ba un bteng biang ia ka kamram, khnang ba ki kam ki jam ha NEHU ba kin long kiba iaid beit iaid ryntih, u la bynrap.
