Nongpoh, Risaw 31: U Monas Bongrung na Pahamdumu bad ka samla Felinza Hansepi na Purdua kila long ki lahduh haka jingïakop mareh bala tip kum ka ‘5KM Run for Unity’ bala pynlong da ka ophis u Superintendent of Police ka Ri-Bhoi District haka treilang bad ka ophis u Distrist Sports Officer lem bad ki bor district ka Ri-Bhoi mynta ka 31 tarik Risaw.

Ïa katei ka jingmareh thong la sdang naduh ka por 6:30 mynstep hapdeng u lapbah naduh Indoor Stadium Saiden bad pynkut pat ha Indoor Stadium Umlyngkdait bad ka thong hi ka long ban wanrah ka jingïatylli, ryngkat ka koit ka khiah namar haba khlaiñ ka met ka phad, khlaiñ ruh ka jingmut jingpyrkhat khamtam ki khun samla ba ki dei ban pynmlien ïalade ban koit ban khiah bad kiar naki jingmlien ba sniew.

Ïa kane ka jingmareh thong la wan ban kaweh lama da u Senior Superintendent of Police ka Ri-Bhoi District u VS Rathore haka jingdonlang u Orville Massar Additional SP, Bah Bobby Nongbet DSO Ri-Bhoi District bad kiwei kiwei ryngkat ka jingshim bynta shitrhem jong ki samla na kylleng ka Ri-Bhoi bad wat kiba la kham noh ka rta.

Ki nongjop ha kane ka jingmareh thong haka liang ki shynrang la rah da u Samla Monas Bongrung haka kyrdan ba nyngkong, u Skhemlang Suba ha ka kyrdan ba-ar bad u Piku Nath haka kyrdan ba lai.

Katba haka liang ki kynthei ka samla Samla Felinza Hansepi ka la wan ba nyngkong, ka samla Jeny Ramde ka la wan ha kyrdan ba-ar bad ha kyrdan ba lai la ioh da ka samla Dakahi Khymdeit.

Ha katei ka sngi la sam ruh ïaki khusnam ba kyrpang naka ki nongshim bynta bala rangbah tam la rah da u Bah Pel Bey haka liang ki shynrang bad ka Sonra Rani haka liang ki kynthei bad ïakitei ki nongjop la sam ruh da ka khusnam trophy bad kumjuh ruh ka song pisa.