Haba la kut noh ka jingiakhun ha ka kylla kaba nyngkong jong ka European Cup 2024, ka England bad Denmark, ki la pynthikna ialade ban rung sha ka Round-16 hadien ba kitei ki ri ki la wan kham shakhmat ha ka miej iakhein point na ka Group C.
Ka jingiakhun kaba khatduh ha ka Group C, ka long hapdeng ka England pyrshah ia ka Slovenia, ha kaba ka jingiakhun ka la shu iakhaid khlem da don kiba lah ban pynkhih jar. Kumjuh ruh ha ka jingiakhun hapdeng ka Denmark pyrshah ia ka Serbia, ka la iakhaid khlem don kiba ioh ban thep kol.
Ka England ka la wan hakhlieh duh ha ka miej iakhein point da kaba la ioh ban khur 5 point, katba ka Denmark ka la ioh 3 point bad kaba la ioh bynta ban bsuh khlieh ialade sha ka Round-16 na ka Group C.
Ha ka jingiakhun jongki ri kiba don ha ka Group-D pat, ka Austria bad ka France ki la pynthikna ialade ban rung sha ka Round-16, ha kaba ka Austria ka la wan ha ka kyrdan kaba hakhlieh duh ha ka miej iakhein point da kaba la ioh 6 points, katba ka France ka la wan ha ka kyrdan ba-ar da kaba la ioh 5 point.
Ka jingiakhun ba khatduh ha ka Group D, kata ka jingiakhun hapdeng ka France pyrshah ia ka Poland, ka jingiakhun ka la kut noh ha ka jingiakhaid da 1-1. Katba ha ka jingiakhun hapdeng ka Austria pyrshah ia ka Netherlands, ka Austria ka la lah ban pynliem noh ia ka Netherlands da 3-2 kol.
