Nongpoh, Risaw 14:  Wat la ka kynhun kiengatiar HNLC ka la kam ba dei ma ka kaba la leit buh ia u Bom IED ha ka  phyllaw ka ïing jong u Ma Nehlang Lyngdoh kaba don ha Umsning ba la pynher syrngiew ia ki paidbah bad khamtam ka dei ka jaka iew, na ka liang ki trai ïing bad ki nongialam Shnong naduh ka Umsning Town Durbar bad ka Dorbar Shnong Umsning Patarim ki la pynpaw ia kata ka mynsiem jong ka jingsngewkhia halor ka jingwan buh ia utei u bom ha katei ka jaka namar ka dei ka jaka paidbah ha kaba lada don ka jingbthei jong u bom IED kan lah ban ktah ia kiba bun ki mynsiem ba kordor.

Haba kren sha ki lad pathai khubor, u Bah Sunshine Makri, uba dei u khun jong u Bah Nehlang Lyngdoh u la ong ba kum ka ïing ka sem ki da sngewkhia shisha ban lap ia utei u bom bad kim tip ruh kaei ka jingthmu ba la wan buh ia u bom, hynrei kaei kaba sngewkhia ka long ba ia ki mynsiem, ba kordor namar katei ka jaka ka dei ka jaka ba long iew bad bun ki nongshong shnong.

U la ong ruh kum ka ïing ka sem kam tip ei ei halor ka jingthmu ba la wan buh ia utei bom bad kim ju don daw badno badno ruh bad kaei kaba ktah ia ki ka long ba ki hap ban pyrkhat ia ki paidbah bad bun ruh kiba shong wai ha katei ka ïing bad don bun tylli ki ing ki sem jong ki para marjan ha kaba lada mih ka jingjia ba sngewsih kane kan ktah shisha ia ka hok long briew man briew.

Ha kawei ka bynta, u la ong ba kum ka ing ka sem ka kam kwah ban don kano kano ka jingjia ba sngewsih bad ruh ban ktah ia ka shongsuk shongsain ki paidbah, namar kumba long haduh  mynta ki paidbah ha ka thain Umsning ki don hapdeng ka jingshong suk shongsain.

Shuh shuh, u la ong ruh ba na ka liang ka ing ka sem ka ai khublei naduh ka tnad Pulit ka Ri Bhoi ha ka jingialam u SP bad ki ophisar, ia ka kynhun bom squad na Shillong, ka Umsning Town Durbar bad ka Dorbar Shnong Umsning Patarim, namar dei lyngba ka jingiatrei lang la lah ban pynduhbor noh a utei u bom bad ruh ym shym la don kano kano ka jingjia ba sngewsih ba kum ka ing ka sem ki kwah ia ka shonguk shongsain ki paidbah.

Haba la ioh ruh ban ia kren bad u Chairman ka Umsning Town Durbar u Bah Rocky Kylla bad u Rangbah Shnong ka Umsning Patarim, kitei ki nongialam Shnong ki la ong ba ki pynpaw ia ka jingsngewsih kaba khraw ba ki briew kiba ym lah ban ithuh ki la wan ban buh bom ha katei ka jaka, namar la jin ba utei u bom u bthei kiba shah ktah hi ki dei ki nongshong shnong katei ka shnong ha kaba bun ki jaid bynriew Khasi.

Ki la ong ruh ba kim kwah ban don kano kano ka jingjia ba sngewsih ha kaba ki shnong ha ka thain Umsning  haduh mynta ki don ha ka shongsuk ka shongsain  bad kum ki nongialam Shnong ki ai khuble ia u SP ka Ri Bhoi bad ia ka tnad Pulit bad rygnkat ka kynhun bom Squad, ba dei lyngba ka jingshim khia jongki, la lah ban pynduh bor noh ia utei u bom bad kum ki nongialam Shnong kim kwah shuh ban don kum kine ki jingwan buh bom ha ki jaka paidbah, ha kaba lada bthei shisha u bom kane kan long ka jingiam briew bad ka jingktah ia ki nongshong shmong kiba bun hi ki dei ki jaid bynriew Khasi jongngi, ki la ong.