Shillong, Ïaïong 21: Sa shisien u Bah Ardent Miller Basaiawmoit kum u President ka Voice Of The People Party (VPP) bad uba dei ruh u MLA ka Nongkrem u la khot la wer ïa baroh ki dkhot ka jaid bynriew ba kin wan ban ïa shim bynta ha ka jingïalang paidbah lahai sngi ka 22 tarik u Ïaïong 2026 naduh ka por 2 baje noh phai sngi ha Motphran.

Kum heh nongïalam ka VPP, u la khot la wer ruh ïa ki paidbah ba kin ïa shim bynta bad ban ïa kit khia ban wan khnang sha kane ka jingïalang na ka bynta ban ïa kren halor ki 8 tylli ki mat kiba kongsan kiba ktah ïaka jaid bynriew bad ban dawa na ka sorkar halor ka jingshah ktah ki samla, ki paibah ha khappud, ki mat kiba ktah ïa u duk u ranglai, ka khyndew ka shyiap nalor kwei kiwei ki mat ban sa ïa kren.

Shuh shuh, u la khot la wer ïa ki paidbah ba kin wan ban shim bynta ha kane ka jingïalang khnang ban lah ban pynurlong ïa ki jingangnud jong ki paidbah na  bynta ka pateng jong ki longdien ki mandien.