Shillong, Ïaïong 27:Na ka jingktah jur ka jingtwa khyndew bad ki Maw ha ki bynta ka Mawlieh ka surok ba pynïasoh sha ki shnong ba hap haka thain Pynursla bad ruh ba la khang ïa ki Kali paidbah ban leit ban wan ba ka don hapdeng ka jingma, ki paidbah nongshong shnnong ka thain Pynursla ki la hap ban mad ïa ka jingsytrok ha ka leit ka wan ban wan sha Shillong khamtam ki samla pule, kiba pang ba shitom bad ki riew paidbah hi baroh kawei.

Kum ban pynkynmaw, dang shen ka la don ka jingtwa maw baheh ha Mawlieh, ha kaba ki 2 ngut ki rangbah ki la duh ïa la ka jingim bad ka Kali kaba ki shong ka la shah ban ha ki Maw ba twa haduh ba ki la duh syndon ïa la ka jingim.

Na katei ka jingjia, ka sorkar ka la khang ban leit ban wan ki paidbah lyngba ki Kali ki motor, namar ka jinglong jingman jongka surok kam da shngain ha kaba ka jingtwa khyndew bad maw ka dang bteng haduh kine ki sngi.

Kumba la ioh lum jingtip, na ka daw ka jingjur slap ha kine ki sngi, ka jingtwa khyndew bad ki maw ruh ka dang jur bad dei namar kane ka daw ka sorkar bad ki bor pynïaid district ki la hap ban khang shwa shipor ïa ki Kali paidbah ban leit ban wan lyngba jong katei ka surok na Shillong ban pynïasoh sha Pynursla bad wat shaduh sha Dawki, ba ka jingpynheh ïa kane ka surok ka dang ïaid shakhmat.

La ioh jingtip ruh ba kiba bun ki shnong sharum pynursla ki la hap ban mad ïa ka jingeh kaba khraw ha ka leit ka wan khamtam ban wan sha Shillong, namar la khang ïa ki Kali paidbah ban ïaid lyngba katei ka surok bad na ka bynta ki kam ki jam ba hap ban wan sha Shillong khamtam ha ka pang ka shitom ki la hap ban pyndonkam ïa ka surok na Dawki sha Jowai ban poi sha Shillong.

Shuh shuh, la ong ruh ka jingeh kaba ki ïa kynduh ym tang ka jingjngai ka jingïaid lynti, hynrei ki dribar kiba kamai ki la hap ban shim kham heh ïa ka bai kali kaba la kot da ki hajar tyngka, kaba ki shah ktah tang na ka jingshah khang katei ka surok Pynursla.