Nongpoh, Nailar 20: Ha ka jingiakhun thma ka Seng Hynniew-Trep Youth Council (HYC) ban khanglad na ka jingwan rung beaiñ ki bar jylla kiba khlem kot khlem sla, ka seng HYC ka la phah ap pahara ia ki nongialam bad ki dkhot ha ki 2 tylli ki khyrdop Infiltration Check Gate ka sorkar kaba don ha Byrnihat bad ha Ratachera bad kynthup ruh ha kiwei kiwei ki khyrdop ha kylleng ka jylla..
Haba ia kren sha ki lad pathai khubor, u Bah Roy Kupar Synrem, President ka HYC Seng Kmie u la iathuh ba ka seng ka la phah ap pahara ha ki khyrdop Infiltration Check Gate mynta la kumba shi taiew ei ei bad ka jingthmu ka long ban talasi naphang ia ki briew kiba wan na shabar na ka bynta ban sakhi haduh katno ngut ki briew kiba ym don kot don sla kiba pyrshang ban wan rung tuh sha ka jylla.
U la iathuh ruh tang hapdeng ka Shitaiew ka Seng ka la ioh ban bat haduh 900 tam ngut ki bar jylla kiba khlem ki kot ki sla bad kiba thmu ban rung beain haka dur ki nongbylla bad ia kine briew kiba ym don kot don sla ka seng ka la pynphai kylla sha ka jaka ba ki wan.
U la ong ruh ha kan ka jingkhynra kaba kham sngewsih ka long ba ki bar jylla ki pyndonkam daki syrnod lane ki kot ki sla kiba shuh thok ha kaba la thoh 1 tarik Rymphang 2026 bad kane hi ka la paw pyrthei ba baroh kitei ki kot ki long ki dei kiba la shu shna thok ha kaba mynta dang dei u snem 2025. U la iathuh ruh ba kum kitei ki syrnod thok la don ruh da ki briew kiba die tuh sha ki bar jylla kiba ieng ha shilynter ka surok bah.
Shuh shuh, u Bah Roy u la iathuh ba ka seng kan nym shong khlie kti hynrei kan nang iai trei shitom ban tehlakam ia kum kine ki bar jylla kiba thmu ban rung beain shapoh ka jylla Meghalaya bad ha kajuh kapor u la kyntu ruh iaki tnad ba dei peit ba kin trei shitom khnang ba ngin lah ban tehlakam ia kum kine ki briew kiba nabar kiba thmu ban rung beain shapoh ka jylla.
