Nongpoh, Ïaiong 28: Hadien ka jingshah ktah ki nongrep hapoh ka Raid Nongpoh ba la kynnoh ba ka Raid ka la dakhol biang ïa ki jaka rep ki nongrep, Ka Seng ki Nongrep ha ka jylla ba la tip kum ka Hill Farmer Union (HFU), Sengkmie ryngkat ka Hill Farmers Union na Ri Bhoi ka la ai ka jingkyrshan kaba pura ïa ki nongrep kiba shah ktah bad ka pynrem jur ruh ïa ka Raid Nongpoh halor kitei ki kam thombor ïa ki jaka jongki Nongrep.

Ki Nongïalam ka Hill Farmer Union ha ka jingïalam u Secretary u Bah Alfondbirth Kharsyntiew bad u President ka HFU Ri Bhoi mynta ka sngi ki la kynduh ïa ki nongrep kiba la shah ktah bad kaba dei ruh hadien ba ki la iohi lyngba ki lad pathai khubor ba ki nongrep ki la shah thombor ha ka Raid Nongpoh.

Kumba la pynpaw da ki nongrep kiba la shah ktah, la ong ba ka Raid ym tang ba ka la dakhol ïa ki jaka rep jongki, hynrei ki la leh donbor ruh ban pynpra wat ïa ka ingsah da kaba pyndonkam da ka puhshilum.

Haba kren sha ki lad pathai khubor, u Secretary ka Hill Farmers Union Sengkmie u Bah Alfondbirth Kharsyntiew, u la ong ba ka kum ka seng kam lah ban pdiang ba ka Raid kan thombor ïa ki jaka rep ki nongrep, namar kane ka ktah ïa ka jakpoh ki nongrep

U la ong ruh ba ka Seng kam kwah ban wan rah kano kano ka huri hura ne ka jingïakynad hapdeng ka Raid bad ki Nongrep, hynrei kaei ka ba ka seng ka kwah ka long ba ka Raid kan sangeh ban dakhol ïa ki jaka rep bad ka dei ruh ban pynbeit noh mardor ïa kane ka kam da kaba sangeh ban dakhol ïa ki jaka bad ka dei ruh ban pynskhem da kaba ai da ki dulir kiba paka sha ki nongrep .

U la bynrap ruh da kaba ong ba kane ka jingshah dakhol jaka ki nongrep ka dei tang na ka jingwan kata ka Project Sorkar bad kum ka seng ka dawa ban nyn ktah ïa ki jaka rep bad ka diang lada ki wna rah ïa kata ka project sha ki jaka ba dang lait bad ym ban ktah ïa ki jaka jong ki nongrep kiba im jakpoh lyngba ka kam rep kam riang.

Shuh shuh, u la ong ruh ba ka seng ka ai ka jingkryshan kaba pura ïa ki nongrep kiba la shah ktah bad kan dang ïa trei lang ba ïa kane ka kam dei ban pynbeit noh mardor bad ym ban thombor ïa ki nongrep kiba long ki budlum ka ioh ka kot bada lada kdiah noh ïa u Budlum kaei ka ban jia bad ka dei sa tang ka jingiap thngan ka ing ka sem, u la bynrap.