Shillong, Ïaïong 01: Ka kynhun ïada mariang kaba la tip kum ka Greentech Foundation mynta ka sngi kala mih shakhmat ban jubab halor ka kyrwoh khubor bala pynlait da ka sorkar jylla, lyngba ka ophis jong u Commissioner Secretary ka tnad Tourism halor ka Luxury Resort & Spa ka ban sa tei harud ka pung Umiam, ha kaba naka liang ka sorkar kala ong ba kala don ka jingïalam bakla haki rynsan social media ha kaba ïadei bad ka jingshna ïa katei ka 5-star resort.

Haba kren sha ki lad pathai kbhubor naka liang u Bah H Bansiewdor Nonglang Chairman ka Greentech Foundation u la buh jingkylli mano kita kiba ïalam bakla bad kiba pynmih khubor bakla sha ki paidbah ha kaba ïadei bad ka jingshna ïa katei ka resort hynrei dei ka sorkar lyngba ka ophis jong u Commissioner Secretary ka tnad Tourism kiba pynsngewthuh bakla bad ïalam bakla ïaki paidbah, namar wat u myntri ba dei peit ïaka tnad Tourism um don jingtip eiei ba ka Lumpongdeng Island ka dei shibynta jong ka 66 akar ka jaka kaba la aiti sha ka IHCL (Tata Group) naka bynta 60 snem ban shna ïa katei ka resort.

Kum ka kynhun ki dap ruh da ka jinglyngngoh ba kumno ka sorkar ka ong ba ym don jingtei ha katei ka dewlynnong katba ka RTI bala jubab da ka MSPCB kala paw shai bala ai ai ïaka Consent to Establish sha ka Umiam Hotels Private Limited bad la kdew ruh ba kan don ka luxury villas, café, restaurant bad kiwei kiwei, hato yn tei ïa kitei ki jingtei ha suiñ? Khlem da tih bad pynieng paia.

Naka liang ka Greentech Foundation ka pynrem jur ïa kane ka kyrwoh kaba thok ba shukor bala pynmih da ka tnad Tourism bad ki ophisar kiba don ha katei ka shuki kim pat tbit ban treikam bad dei ban hiar shuki mardor bad haduh mynta wat ka RTI bala pan ruh ki khlem lah ban ai jubab.

Ka kyrwoh kaba shai na katei ka kynhun ka long ba em te em wat ktah ne wat pynjot ïa ka Lumpongdeng Island.