Shillong, April 01: U Myntri rangbah ka jylla Meghalaya u Conrad K. Sangma mynta ka sngi u la leit ban shim bynta kum u konsan na ka bynta ban pynkhamti ia ka Meghalaya IT Awards 2026 sha ki samla pule kiba pas bha ha ka Academic year 2025 ba la pynlong mynta ka sngi ha Soso Tham Auditorium, Shillong.
Ia kane ka jingpynkup burom la pynlong da ka Information Technology & Communications Department ka sorkar Meghalaya bad la wan ruh ban shim bynta da u Bah Lakmen Rymbui, uba dei u Myntri ka tnat pule puthi hapoh ka jylla lem bad kiwei kiwei ki heh ophisar ka sorkar.
Shi bynta na kane ka jingpynkup buromm ia ki samla ba pas bha bad kiba wan shakhmat ha ki jingpule, la sam ruh ia ki Laptop sha ki samla pule da u Myntri rangbah ka jylla bad u Bah Lakmen Rymbui ryngkat kiwei ki heh sorkar.
Haba ai jingkren ha kane ka sngi kum u kongsan, u Conrad K. Sangma u la ai khublei kyrpang ia kitei ki samla pule kiba la ioh pdiang ia ki khusnam ba la tip kum ka Meghalaya IT Awards 2025 bad kane ka jingioh pdiang ia ki khusnam ka dei namar ba ki samla pule ki trei shitom bad ki duh thiah duh dem ban pule kot ha kaba ki don ia ka hok ban ioh ia ka jingithuh ne ia ka khusnam.
Haba kren ruh halor ka jingsam Laptop, u la ong ba kane ka jingai laptop ka dei ka jingai sngewbha ia ki samla pule bad ka thew ruh kumm ka jingai mynsiem bad ka jingpynshlur ba kin dang lah ban trei shitom ha ki jingpule.
Da kaba ai kyntu kynpham ia ki samla pule, u Conrad u la ong, “ Nyngkong eh, dei ban don ka jingiaishah ha ka jingim bad ka jingjop kaba shisha ka wan tang lada ki samla ki ngeit ia kata ka kam kaba ki leh ban poi sha ka thong jong ka jingim.
Kiwei kiwei kiba la ai jingkren ki kynthup ia u Bah Lakmen Rymbui myntri ka tnad pule puthi, u Bah K. L. Nongbri, Joint Secretary ka sorkar jylal ba peit ka tnad Information Technology & Communications ha ka jylla bad ka Samla Leisha Agarwal na St. Margaret;s HSS kaba de ka topper ha ka SSLC 2025 kaba la iaroh ia ka tnad Information Technology & Communications bad ia ka sorkar jylla kiba la ai burom ia ki samla pule lyngba kane ka jingpynkup burom.