Nongstoin, Jylliew 27: Kumba 3 tylli ki kali jong kawei ka kompani bala tip kum ka Joint Stock Company Industrial Association kaba dei na Nongbah Delhi bad kaba shna surok haka thaiñ Nongstoiñ sha Wakaji, kila shah thang dusmon haki runar bym lah ban ithuh durkhmat.
Naka liang u Project Manager katei ka kompani u Satish Kumar u la ïathuh ba katei ka jingjia kala jia haka por kumba 4:15 eiei mynstep ha Ladweitang kaba dei ruh ka jaka sah jong ki nongtrei katei ka kompani, bad naka liang ki nongtrei kila ioh sngew ruh ïaka jingsawa bad mih mar mar shabar hynrei kila iohi pynban ba ki kali kila kem ding.
Shuh shuh kitei ki nongtrei katei ka kompani kila pyrshang ruh ban tem ïaka ding, hynrei namar ka jingklang ka ding kala bam duh ïa kitei ki kali bad donbok ba ha katei ka jingjia ym shym don mano mano ba mynsaw.
La ioh jingtip ruh nalor kitei ki kali, kawei ka puh shilum jong katei kajuh hi kompani kala shah thang mynne mynstep haka shnong Mawthungkper.
