Nongpoh, Nohprah 15: Hadien ka jingrung Congress noh u Bah Victor Rani, MDC ka NPP na Jirang Constituency ha kine ki khyndiat sngi ba la dep, kaba u la leit pan ticket na ka party Congress, kane ka la buh jingeh ïa ka party NPP ha Jirang Constituency ïano ban ai ïa ka ticket, hynrei kumba la sawa ka sur na ki nongïalam ka Jirang Block ka lah ban poi sha u pud ba u MLA ka Jirang u Bah Sosthes Sohtun u hap ban ïa khun kum u kyrtong ka NPP ha kane ka election MDC na Jirang Constituency.
Kumba long haduh mynta, ki don3 ngut ki kyrtong kiba la pan ticket na ka party NPP ban ïa khun ha kane ka election MDC na Jirang, kiba kynthup ïa u Bah Kitboklang Khongiong, u Bah Albertus Lapang bad u Bah Balawan Syiemiong bad nadpeng ki kyrtong ka kyrteng u MLA ruh ka sawa jur, ha kaba lada kim lah ban ai ïa ka rai ïano ban ai ticket ka lah ban poi sha ka bynta kaba u MLA u hap ban ïa khun ha kane ka election MDC na Jirang Constituency.
Kane ka jingklumar ha kaba ai ticket MDC na Jirang Constituency, ka la mih tang hadien ba u Bah Victor Rani kum u MDC ka NPP u la pynshai paidbah syndon bad ruh ba u la leit ban pynïasoh sha ka party Congress kaba u la pan ticket ban ïa khun na Jirang, kaba halor ka jingkynnoh kaba u la kynnoh ba ka dei ka jingkyntait ka party NPP ban pan ticket bad ban rung noh sha ka Party Congress ban pan ticket MDC na Jirang.
Halor ka jingkynnoh u Bah Victor Rani, MDC ka NPP na Jirang ba u la shah pynduh ticket bad ba la leit rung noh sha ka party Congress, ki nongïalam ka NPP Jirang Block, dang shen ki la hap ban lum kyrkieh ïa ka jingïalang ban rai halor ka ticket, hynrei hapdeng ka jingïatai ne ïa thir sani kim pat lah ban ai ïa ka rai ïano ban ai ïa ka ticket hadpeng kitei ki 3 ngut ki kyrtong kiba la pan ticket na party NPP na Jirang.
Ha katei ka jingïalang ba la don lang naduh u Bah Sosthenes Sohtun, u MLA bad uba dei ruh u President ka NPP Jirang Block bad ruh u District President ka NPP u Bah Clement Mawlong bad kiwei ki nongïalam, ha kaba kim shym la lah satia ban shim ïa ka rai ïano ban ai ticket hapdeng kitei ki 3 ngut ki kyrtong ba la pan ticket, hynrei ka sur kiba bun na ki Nongïalam ki la kwah ba u MLA un ïa aireng ha kane ka election MDC na Jirang.
Na ka liang u MLA ha katei ka sngi hadien ba la mih ka kyrteng jong u ban ia khun hi ha kane ka election MDC na Jirang um shym la lah ban ai rai, tad haduh ba hap ban pynkut noh ia ka jingnialang, kaba kin sa shim rai pat hadien hadien ba ki la dep ban ia shong pyrkhat biang para nongialam hapoh ka Jirang Block.
