Nongpoh, Jymmang 30: Hadien ba la mih ka jing bym iasngewthuh jingmut ki Nongialam ka HANM RiBhoi Sepngi bad ka Sengkmie kaba la pynlong syndon iaki nongialam naduh u President bad kiwei ki nongialam bad ki dkhot kila hap ban mih lut noh syndon naka ne ka seng bad mynta ka sngi kine ki nongialam bad ki dkhot ki la pyniasoh syndon sha ka seng Confederation of Ri Bhoi People (CoRP) ba ki don ka jingshaniah ba kane ka seng kan don ka riti treikam kaba skhem bad kaba khuid.
Ki nongialam ka Confederation of Ri Bhoi People (CoRP) ha ka jingialam u Bah Pateng Myrsing kum u President lem bad u General Secretary ka seng u Bah Markus Makri bad u vice President ka seng u Bah Gershome Hat mynta ka sngi ha ka jingialang ha Patharkhmah ki la pynskhem bad pyntian smai syndon iaki Nongialam ki ba thymmai jong ka CoRP Ribhoi Sepngi na ka bynta ka samoi treikam jong u snem 2026 haduh 2029.
Haba pynskhem bad pynbam smai ia kitei ki nongialam ka CoRP la wan ai mynsiem lang ruh da ka jingdon lang u President ka HNYF Ri Bhoi Sepngi u Bah Pynkhraw Makri lem bad ki nongialam na ka Hima Jirang.
Ki nongialam ka CoRP Ri Bhoi Sepngi kiba la pynskhem bad pynbam smai mynta ka sngi ki kynthup ia u Bah Sumar Lyngdoh ba la shah jied kum u President, General Secretary u Bah Rounningwell Syngkli, Woster Thangkhiew Vice President, Finance secretary Jemfulstar Wahlang, Organising Secretary u Bah Prison Makri, Publicity Secretary u Bah Plomstar Mawblei ha ryngkat ki wei pat ki nongialam ba ha khmat bad ki dkhot ki ba la poi haduh 23 ngut.
Haba kren ha kane ka sngi kum u President ba rangbah ka CoRP, u Bah Pateng Myrsing u la ong ba kum ki nongialam seng bhalang bunsien ngi shah beit shah kynnnoh namar ba don ki seng bhalang kiba ym shym la treikam bad u la kyntu pat ia kine ki nongialam ba thymmai ka CoRp Ri Bhoi sengngi ba ki shim ia ka jingkitkhlieh ban shakri sha ki paidbah bad ym ban rung sha ka seng tang ban ioh jingmyntoi shimet.
Sa Peit Ruh
