U Myntri Rangbah ka jylla u Conrad K Sangma, u la leit ban ia shim bynta ha ka jingleh burom khatduh ban tep noh ia ka met bakhuid jong u Pope Francis ha ka jingleh burom kaba long mynta ka sngi ha Vatican City.
La sakhi ba ha kane ka sngi ka jingon tep ia u Pope Francis ba la pynlong ha St. Peter’s Square, da palat lakh ngut ki riew pawkhmat ka pyrthei ki la poi ban leit ai khublei khatduh ka u Pope u ba la khlad na kane ka sla pyrthei ha ka 21 tarik Iaiong 2025.
Na ka liang u Conrad K Sangma, u la pynpaw ba da ka mynsiem kaba sngewkhia halor ka jingduhnoh ia u wei na ki riewkhuid bakhraw ha ka pyrthei, na ka liang jong u, u la poi ban ia shimbynta ha kane ka sngi on tep ia ka met ba sah jong u Pope Francis, bad ka long kaei kaei kaba nga sngew ioh jingkyrkhu.
Lah ban kdew, ba u Conrad K Sangma, u la ia kynduh markhmat bad u Pope Francis ha u Nohprah 2022, ha kaba u la ioh ruh ban kyrpad na u ba un kynmaw lem ha ki jingduwai ki jong u ia ka jylla Meghalaya bad ki paidbah nongshong shnong baroh na bynta ka bit ka biang bad ka jingkiew jong ka jylla bad ka ri India hi baroh kawei.
La synranlang ia u Conrad K Sangma ha kane ka jingleit sha Vatican, da u Bah Daniel Thangkhiew u ba dei u Officer on Special Duty bad ruh u Political Secretary.
