Nongpoh, Ïaïong 28: Daka jing angnud palat ban ïoh noh ïa u surok Nongpoh-Umden-Sonapur kaba la dei kawei naki mat ba la ïa khun da bun tylli ki snem, ha kane ka sngi na ka liang ki katto katne ngut ki riew Paidbah bad ki nongialam shnong kiba ju pyndonkam ïa u Surok NUS ki la pynpaw iaka jingkmen hadien ba ka kam ban pyntrei ïa utei u surok ka la sdang bad ka la ïaid shait shait.
Kum ban shu pynkynmaw, ïa ka jingsdang ban pyntrei ïa u surok Nongpoh Umden uba don iaka jingjrong 20 Kilometre la dep ban wan buh mawnongrim da u Symbut myntri rangbah ka jylla u Bah Prestone Tynsong haka 10 tarik Nohprah 2024 ha kaba la pynmang T. 49.53 klur ka ba yn shna daka Intermediate Lane haka jingiar kaba 5.5 meter bad ïa kane ka jingsdang ban pyntrei noh ia u surok la sakhi ba ki kam ki la sdang ban iaid shait shait
Haba ioh ban ïa kren bad ki katto katne ngut ki Riew Paidbah bad ki Nongialam shnong, ki la pynpaw shisha ïa ka jingkmen ba kane ka jingangnud jong u paidbah kaba la slem mynta ka la sdang ban urlong.
Kitei ki Nongkren ki la ai khublei ïa ka Sorkar lem bad ïa u Bah Prestone Tynsong kiba la sngap ïa ka jingud bad ki jingjynjar u paidbah bad ki la pynpaw ruh iaka jingkhublei ïa u Bah Mayralborn Syiem, MLA ka Nongpoh bad MDC Nongpoh kiba la donkti naduh nyngkong ban ïa khun tyngeh haduh ban pynioh ïa une u surok
Haba ioh ban iakren pat bad u MLA ka Nongpoh u Bah Mayralborn Syiem u la ai khublei iaka sorkar kaba la sngap ïa kane ka jingud jingnam jong u paidbah kaba la long ruh kawei naki mat ba la dawa mynta la bun bun snem.
U la ong ruh, haba ka jingangud mynta ka la urlong bad ka kam ka la nang iaid shakhmat, ki paidbah ki dei ban long kiba iai shah bad ki ban ai iaka jingiatreilang khamtam mynta ha ka por jong ka aiom slap kan don shibun ki jingthud ha ka leit ka wan hynrei ki paidbah kin long kiba iai shah shitom ha kaba tang katto katne bnai yn sa lah ban pyndep lut ia ka kam.
“Haba kylli pat halor ka jingkwah nam kwah burom ha kaba ia dei bad ka jingurlong utei u surok Nongpoh-Umden-Sonapur kaei kaba naka liang jong u kum u MLA u don ban pynsngew bad iano yn ai nam”, U bah Mayralborn u la ong, ba kum u Nongmikhmat ba la jied da u paidbah u kwah ba u surok NUS uba la sniew u dei ban iong hapoh shisnem bad um kwah satia ïaka nam bad iaka jingiaroh, bad ai kiba kwah kin ioh iaka nam hynrei u paidbah uba stad bad kiba la iohi ia ka jingiaid lynti jong u ki kham tip kham bha”.
