Mawkyrwat, Jymmang 30: Kawei na ki jingangnud ba khraw ha ka liang ka pule puthi ha South West Khasi Hills District ka la urlong mynta ka sngi hadien ba u Symbud Myntri Rangbah ka Jylla, u Bah Sniawbhalang Dhar, u la plie paidbah ïa ka Rilang College ha ka shnong Mawsaw. Ïa kane ka kolej la tei hadien bun snem daka jingïatreilang bad ka jingshimkhia jong ka Rilang Education Society (RES).
Ha ka jingïalang plie paidbah la sakhi lang da u MLA ka thaiñ bad President ka Governing Body, u Bah Renikton L. Tongkhar, ka Deputy Commissioner ka South West Khasi Hills District ka Kong A.L. Mawlong, u Superintendent of Police u Bah B. Jyrwa, u Dr. K.K. Nongsiej uba dei u Secretary ka Governing Body, ryngkat ki founding members, ki nonghikai, ki samla pule, ki khynnah skul bad ki paidbah na ka thaiñ.
Ka jingplie ïa kane ka kolej ka long ka jingkyrkhu kaba khraw ïa ki samla pule jong ka thaiñ Shiliang Um namar hadien ba ki la pyndep ïa ka matrik, kin ym donkam shuh ban leit wad jingnang jingstad sha ki jaka kiba jngai hynrei kin lah ban bteng ïa ki jingpule jong ki ha katei ka college.
Sa Pule Ruh | Phla u Ma Ngaitlang Dhar ba dei ma u, uba wan rah ia ka Party NPP ha Umroi
Haba kren ha kane ka sngi, u Bah Sniawbhalang Dhar u la pynpaw ïa ka jingsngewnguh kaba kyrpang ïa ka kur Iawphniaw kaba la ai ei ïa ka jaka kaba heh kumba 5-acre tam ban tei ïa kane ka shlem ai jinghikai. U la ong ba ka jingïarap jong ka kur ka la long ka nongrim kaba kongsan eh ban pynurlong ïa kane ka projek.
U Dy. CM u la ai jingïaroh ruh ïa u Bah Renikton L. Tongkhar halor ka jingïohi jngai jong u bad ka jingïalam lynti ban seng ïa kane ka kolej, kumjuh ruh ïa ka jinglah jong u ban lum ïa ki riew rangbah bad ki paidbah kiba la noh synñiang pisa ban kyrshan ïa ka jingïaid shaphrang jong kane ka shlem pule.
Kum ka dak ka jingkyrshan jong ka sorkar bad ka jingangnud ban kyntiew ïa ka pule puthi ha kane ka thaiñ, u Bah Sniawbhalang Dhar u la noh jingïarap pisa haduh T. 5 lak sha ka kolej. Shuh shuh, u la kular ruh ban pynioh ïa ka jingker sawdong (fencing) jong ka campus kaba jrong kumba 600 metre eiei, khnang ban pynbha bad pynskhem ïa ka jingtei jong kane ka shlem ai jinghikai.
Sa Peit Ruh
