Shillong, Naitung 10: U Myntri ka tnat ka Tourism u Timothy D Shira hynne ka sngi ula ong ba ka jingthmu jong ka Sorkar ban buh jaka bam lane ka (Food Court) ha Umling Ri-bhoi District kadei ban ai jaka iaki nongwan shangkai pyrthei (Tourist) haka por ba ki dang shah talasi ne pynrung kyrteng haka Tourist Registration Centre.
Haba kren shaki lad pathai khubor u Timothy ula ong ba ka jingthmu jong ka tnat Tourism kadei ban don ki kamra pyndonkam iaki nongwan shangkai pyrthei (Tourist) bad ka Tourist Registration Centre ha Umling.
U Timothy ula ong ba nalor ka jaka bam lane ka Food Court, kin don ruh 2 tylli ki kamra naka bynta ka jingpyndonkam jong ki Officer ka tnat Tourism ki ban pynrung kyrteng lane talasi iaki nongwan shangkai pyrthei (Tourist) kiba hap ban wan shwa sha kane ka jaka hashuwa ban rung shapoh ka Jylla Meghalaya, lada ki wan na Ribhoi District.
“Ka Plan jong ngi ka long ban don 2 tylli ki kamra ban leh ia ki kam ophis ban pynrung kyrteng iaki nongwan shangkai pyrthei (Tourist) bad ha ka por ba pynrung kyrteng katto katne por yn shim por, kumta ha kata ka por ki Tourist ki donkam ban bam ne shong jah thait bad dei namar kata ngi la mang ban buh ka jaka bam lane ka Food Court ha Umling Ri-bhoi district” la ong u Timothy.
Sa pule ruh: Daka Dukan Thymmai Pynshna Ka Ïarap Ban Kner Ïaka Longïing Ba Duk
U Timothy ula ong ba Tourist Registration Centre kan long kum ka Inner Line Permit (ILP) kumba la leh ha kiwei ki Jylla kum ha Nagaland ha kaba ki briew kiba rung sha katei ka Jylla, ki donkam ban pynrung kyrteng ialade.
Ula ong ba ka jingdonkam ban don iaka Tourist Registration Centre kadei namar ba teng teng ym lah ban tip, la ki briew ki wan sha Meghalaya kum ki nongwan shangkai pyrthei (Tourist) ne ki wan ban leh kam sinew haka dur jong ki Tourist.
“Kumta ngi sngew ba ka long kaba donkam ia ngi ban bishar bniah ia ki kot ki sla jong ki, la ki dei shisha ki nongshong shnong bashisha jong ka ri India ne ki wan na kiwei pat ki ri bad lada kumta ki don ne em ia ki kot ki sla kiba biang” ula ong.
U Myntri ula pyntip ruh ba ka tnat Tourism ka don iaka Tourist Registration Centre rilum Garo Hils kata ha Berubari bad ha kane ka jaka ruh ka don ka jaka bam bad ka jaka shongthait naka bynta ki nongwan shangkai pyrthei kiba dang pynrung kyrteng haka Centre.
Haba iadei bad ka jingpyrshah ka Khasi Student Union (KSU), u Myntri ula iathuh ba naka liang ka ophis deputy commissioner (DC) kala dep ban iakren bad ka KSU bad kala kyrpad ruh ban nym pynthut iaka kam ba dang pyntrei.
Sa peit ruh
