New Delhi, Naitung 10: Ka jingsdang jong ka 4th Meghalaya Pineapple Festival ha Dilli Haat, New Delhi, ka la sakhi ïa ka jingtuid ki paidbah bad ki nongthied kiba la boi ïa u sohtrun na Meghalaya haduh ba tang hadien khyndiat por ba la buh ha ki stall, bun na ki soh ki la lut noh. Kane ka pynpaw shai ba u sohtrun na Meghalaya u dang bteng ban long uwei na ki marrep kiba don ka jingdawa kaba jur ha ki ïew jong ka ri.
Ha kane ka tamasa kaba lai sngi, ka jylla Meghalaya ka la wanrah haduh 25 metric ton u sohtrun bad la wan shim bynta ruh da kumba 250 ngut ki nongrep bad ki nongsengkam lajong na kylleng ki distrik ban pyninam bad die ïa la ki marrep.
La plie paidbah ïa ka tamasa da u Myntri ka Sorkar Pdeng uba peit ïa ka tnat Communications bad Development of North Eastern Region (DoNER), u Jyotiraditya Scindia, ha ka jingdonlang u Myntri Rangbah ka Meghalaya Conrad K. Sangma, u Commissioner & Secretary ka Sorkar Meghalaya Vijay Kumar, ki ophisar bad ki nongrep.
Haba ai jingkren, u Jyotiraditya Scindia u la ong ba ka Meghalaya ka la lah ban pynlong ïa ka rep ka riang kum kawei na ki bynta kiba kongsan tam ha ka roi ka par ka jylla. U la ai jingïaroh ïa ka sorkar jylla kaba la thaw ïa ki lad ban pynïasoh ïa ki nongrep bad ki ïew kiba heh, kaba la pynlong ïa ki nongrep ban ïoh jingïohnong kaba kham bha haba nujor bad ki snem kiba la leit.
U Myntri ka Sorkar Pdeng u la kdew ba u sohtrun na Meghalaya u dei uwei na ki sohtrun kiba thiang tam ha ka ri India bad u la ïaroh ruh ïa kiwei pat ki marrep ba pawnam jong ka jylla kum u shynrai Lakadong, u sying, u sohmrit bad kiwei kiwei kiba la nang ïoh jaka ha ki ïew jong ka ri. U la ong ba lyngba ki prokram kum ka M-LAMP Programme, CM Farm+ Programme bad Meghalaya Organic Mission, palat 90,000 ngut ki nongrep ki la ïoh jingmyntoi, kaba la pynkhlaiñ ïa ka rep ka riang bad ka ïoh ka kot jong ki nongrep.
U la ong ruh ba ka Ministry of DoNER ryngkat bad kiwei pat ki tnat ka sorkar lem bad ka sorkar Meghalaya kan dang bteng ban kyrshan ïa ka jylla, da kaba pynjanai ïa ka jingpynmih ïa u shynrai Lakadong, khnang ba ki nongrep kin ïoh ïa ka dor kaba biang bad jingïohnong kaba kham bun.
Na ka liang u Myntri Rangbah ka Meghalaya, u Conrad K. Sangma, u la ong ba ka Meghalaya Pineapple Festival mynta u snem ka la heh bad kham seisoh ban ïa ki snem kiba la dep, namar ka jingbun ki nongrep bad ki nongsengkam kiba la wan shim bynta. U la ong ba kane ka tamasa kam dei tang ka jaka ban die ïa u sohtrun, hynrei ka dei ruh ka rynsan ban plie lad ïa ki nongrep ban ïoh jinghikai, jingïakynduh bad ki nongthied bad ki kompani, kaba wanrah ïa ka jingïohnong kaba kham bha.
U Conrad u la ong ba ka sorkar jylla kan dang bteng ban pynkhlaiñ ïa ki lad jingïarap ïa ki nongrep, ban pynïar ïa ki ïew bad ban pynpaw paidbah ïa ki marrep ba pawnam jong ka jylla ha ki jylla bapher bapher bad wat sha ki ïew ka pyrthei, khnang ban pynkhlaiñ ïa ka ïoh ka kot jong ki nongrep bad ban kyntiew ïa ka jylla Meghalaya kum ka jylla kaba khlaiñ ha ka rep ka riang.
Sa peit ruh
