U Damanbait Lamare, MLA Umroi, hynnin ka sngi u la leit ban jurip ia ka Iingmane ka Balang Presbyterian ha Mawbsein Lum Mission, ka Iingmane kaba dang sahteng ban pyndep bad kumjuh ruh ba katei ka Balang ka don ha ka jingpynkhreh ban pdiang ia ka Jingiaseng Presbytery ka Ri Bhoi Synod ha u snem 2026.
Nalor kaba u leit ban jurip ia katei ka Iingmane bad kynduh ia ki nongialam ka Balang Presbyterian, u MLA Umroi, u la leit ruh ban kynduh ia ki nongialam ka Managing Committee jong ka skul St. Joseph Secondary School, kaba don hapoh ka shnong Mawbsein Lum Mission, kata na bynta ban iakren ba kumno ban pynheh shuh shuh ia ka Building jong katei ka skul.
Ha katei hi kajuh ka sngi, u Damanbait Lamare, u la leit ruh ban kynduh ia ki nongialam ka Balang Presbyterian ka Umden Arka Presbyterian (KJP), namar ba katei ka Balang ka don ha ka jingpynkhreh ban rakhe ia ka Golden Jubilee ne ka jingpynkhreh ban rakhe ia ka jingdap ba 50 snem jong katei ka Balang.
Haba iadei bad katei ka sngi ba u la leit jurip, u Damanbait Lamare, kum u MLA ka Umroi, u la ai ka jingkular ba un iatreilang bad kitei ki nongialam Balang bad ki briew kiba dei peit ia katei ka skul kaba u la leit jurip, na bynta ban wanrah ka jingmyntoi ia ki riewngeit jong kitei ki ar tylli ki Balang bad kumjuh ruh ia ka St. Joseph Secondary School ha Mawbsein Lum Mission.
