Nongpoh, Kyllalyngkot 09: Da ka jingkmen bad ka jingsah jingkynmaw, ka tnad jong ka ICAR, for NEH region, ka la ioh ban plie ia ka jingrakhe ia ka jubili ksiar da kaba plie ruh ia ka iew dielang (Farmer’s Expo) ban pyninam ia ki mar rep bad ki jingthung ba la pynmih da ki nongrep ka thain shatei lam mihngi, ia kane ka jingrakhe la pynlong hapoh ka phyllaw jong ka ICAR ha Umiam.
Watla ia kane ka jingrakhe, la dei ban wan ban shimbynta da ka President ka ri India ka Droupadi Murmu, hynrei namar ki daw ki bym lah kiar, la wan ban plie noh ia kane ka jingrakhe da u Lat ka jylla u CH Vijayashankar kum u kongsan ha ka jingiadonlang ruh u Myntri Rangbah ka jylla u Conrad K Sangma, u Myntri ka tnad rep ka riang ka sorkar pdeng u Shivraj Singh Chouhan.
La sakhilang ruh ha kane ka sngi, da ka Dr. Ampareen Lyngdoh, Myntri ka tnad rep ka riang ka jylla Meghalaya, u Dr. Himanshu Pathak, Director General, ICAR & Secretary, DARE, Government of India, Bah D.P. Wahlang, Chief Secretary ka jylla, u Dr. Suresh Kumar Chaudhari, Deputy Director General (Natural Resource Management), ICAR, New Delhi nalor kiwei kiwei ki heh officer ka tnad ICAR ka thain shatei lam mihngi.
Haba kren kum u Kongsan, u Lat CH Vijayashankar nyngkong eh u la pynpaw ia ka jingkmen ban ia donlang ha kane ka sngi khraw jong ka tnad ICAR for NEH Region ban rakhe ia u mawmer ba 50 snem ka jingiaid lynti ban pynjanai ia ka rukom rep rukom riang ha kane ka thain shatei lam mihngi lyngba ki stad jingwad bniah kiba katkum ka juk kaba mynta na bynta ka jingmyntoi jong ki nongrep ha kane ka thain hi baroh kawei.
U la ong ruh, ba ka jingdon jong ka ICAR hapoh kane ka jylla Meghalaya, ka la long shisha ka jingkyrkhu ia ki paid nongrep ha kylleng ki shnong ki thaw ban ioh ia ki lad jinghikai kumno ban pynjanai ia ka rukom rep rukom riang khamtam, kumba lah ban tip ba kane ka jylla ka dei ka jylla kaba riew spah bha ha ka jinglong jong ka mariang khamtam ka khyndew na ka jinglong kaba seisoh ban pynmih shibun ki jingthung bad ki mar rep bapher bapher.
Shuh shuh ruh, u la ban khia, ka long ruh kaba kongsan ban wanrah ia ka rukom rep tynrai kaba iahap lang bad ki kor ki bor jong ka juk kaba mynta, ha kaba la sakhi ruh ia ka jingnang phaikhmat jong ka sorkar pdeng ban kyntiew ia ka kam rep kam riang lyngba ka jingbei pisa bad ruh ban wanrah ia ka teknoloji kaba paka ban pynkylla dur ia ka rukom rep ha ka ri hi baroh kawei na bynta ka jingmyntoi bad kyntiew ia ka ioh ka kot jong ki nongrep.
Na ka liang, u Conrad K Sangma, u la pynpaw ia ka jingkmen bad ban ai jingiaroh ia ka jingtreishitom jong ka ICAR for NEH Region, halor ka jingiaid lynti kaba 50 snem ban kyntiew ia ka kam rep kam riang lyngba ki jingwad bniah kiba paka bad kiba janai kumno ban nang pynmyntoi ruh ia ki nongrep ban kyntiew ia ka ioh ka kot jong ki.
U la kdew ruh, ba ka thain shatei lam mihngi ka dei ka thain kaba riewspah bha ha ka liang ka rep ka riang bad kaba pynmih shibun ki mar rep kum u sohtrun, tit, sying, u synrai, ki jhur ba bunjait, ki jingrep tynrai bad kiwei kiwei, hynrei namar ka jingbym don pat ia ki lad ne ki jingdonkam kiba kongsan ym shem la lah ban pyniaid iew bha ia kine ki mar rep.
Shuh shuh ruh, u la pynpaw, ba ka long kaba kongsan shisha ban nang ioh ia ka jingiatreilang bad ka sorkar pdeng ban wanrah ia ki jingdonkam kiba kongsan, la ki dei ha ka liang ki skhim ne ki jingtei kiba paka nalor ki lad wad jingtip katkum ka juk ba mynta ban kyntiew bha ia ka kam rep kam riang hapoh kane ka thain, da kaba ai jingiaroh ruh ia ka jinglen lade da ki ophisar, ki nongwad bniah ka tnad ICAR ban nang pynjanai ia ki rukom rep hapoh kane ka thain ban pynmyntoi ia kiba bun khamtam ki nongrep bad ban kyntiew ia ka ioh ka kot jong kane ka thain.
La ioh jingkren ruh, na u Myntri ka tnad Rep ka Riang ka sorkar pdeng u Shivraj Singh Chouhan, u ba la ai jingiaroh bad ai khublei kyrpang ia ka ICAR halor ka jingiaid lynti jong ka ban shakri ha ka ia dei bad ki kam rep kam riang, ha kaba u la kren pynshai halor shibun ki jingtreikam jong ka sorkar pdeng ban pynkup bor ia ki nongrep lyngba ka jingphaikhmat ban pynjanai ia ka kam rep kam riang bad ki jingdonkam kiba kongsan.
Na ka liang ka President ka ri India ka Droupadi Murmu, watla kam shem la ioh ban ia donlang ha kane ka jingrakhe hynrei ka la ioh pat ban ai jingkren kitbok kitrwiang ia ka ICAR for NEH region ban iaroh ruh ia ka jingtreishitom jong kiba don ka bynta kaba khraw ha kane ka tnad ban kyntiew bad pynkylla dur ia ka rukom rep rukom riang lyngba ki jingkren jong ka lyngba ka kor internet (Online).
