Nongpoh, Jymmang 09: Na ka 100 klur ba la mang da ka sorkar jylla lyngba ka CM – Assure Scheme, ka Ri Bhoi District ka ioh pdiang haduh 4 klur tyngka ban iarap kyrpang na ka bynta ban kyntiew ia ki nongrep hapoh kane ka District.
Ia kane la kren mynta ka sngi da u Myntri Rangbah ka jylla, u Conrad K. Sangma haba leit ban shim bynta kum u kongsan ban kaweh lama ha ka ban pynlait paidbah haduh 1700 MT u Synsar ba la shimti da ka sorkar bad ban pyniaid iew shabar, ha ka jingialang kaba la long mynta ka sngi ha Basuba Brooms Producer Company Limited kaba don ha Khliehumstem ba hap ha Mawhati Constituency ha Ri Bhoi District.
Kane ka jingshimti ka sorkar ia kitei ki synsar ba la pynmih da ki nongrep ka dei lyngba ka CM-Assure Schemes ba ka sorkar ka mang kyrpang na ka bynta ki nongrep hapoh ka jylla bad ia une u synsar ka sorkar kan phah sha Central Warehousing Corporation, Guwahati ba kin sa lilam pat ha kino kino ki Company ne kynhun shimet kiba lah ban khlieh dor khnang ban myntoi ki nongrep.
Haba kren ha kane ka sngi u Myntri rangbah ka jylla, u Conrad K. Sangma u la ong ba ka sorkar ka don ia ka thong ban phai khmat kyrpang ia ki nongrep hapoh ka jylla bad lyngba ka CM-Assure la mang tyngka haduh 100 klur ha kaba la dep ban pynlait ia ka pisa kaba 10 klur bad 4 klur tyngka tang na ka bynta ka Ri Bhoi, kaba dei kawei ka thong ban kyntiew ia ka ioh ka kot ki nongrep.
U la kren shai ruh sha ki nongrep ba ka sorkar jylla ka don ryngkat bad ki nongrep bad kan ka sorkar kan treikam ryngkat ryngkat bad ki nongrep na ka bynta ban kyntiew ia ka ioh ka kot bad khamtam ban pyniaid iew ia ki mar rep khnang ba kan kyntiew ia ka ioh ka kot ki nongrep.
Shuh shuh, u la bynrap ruh lyngba kane ka CM Assure Scheme, ka dei ka thong ka sorkar ban kyntiew ia ka ioh ka kot ki nongrep, ban kyntiew ia ka longbriew ka manbriew bad ruh shi bynta ban kyntiew ia ka ioh ka kot ki nongrep.
Khatduh eh, u la pynshai ruh ka sorkar ka buh shibun ki thong ha kaba lyngba ka CM-Assure ka long ban kryshan ia ki nongrep ba kin ioh ia ka dor kaba biang ia ki mar rep ba ki rep, lyngba ka CM-Elevate ka thong ka long ban pynkupbor ia ki nongrep ha ki shnong nongkyndong bad ruh ban thaw shibun ki lad ki lynti kum ha kaba kyntiew ia ki mar rep ba rep khlem da pyndonkam dawai bad kumjuh ruh ban dang pynkhlaiñ ban pynmih ia ki mar rep kiba long ka jingmyntoi ki nongrep bad ruh ban kyntiew ia ka ioh ka kot ka jylla.
Ha kane ka sngi, u Myntri rangbah ka jylla, u Conrad K. Sangma u la aiti ruh ia ka Kali Pick-up sha ki nongrep ba ioh jingmyntoi lyngba ka CM-Elevate.
Ha kane ka sngi, la don ryngkat ruh u MLA ka Mawhati u Bah Charles Marngar, u deputy Commisssioner ka Ri Bhoi, u Abhilash Baranwal, ki ophisar sorkar na ka tnad Agriculture bad ki paid nongrep na kylleng ka thaiñ Ri Bhoi.
