U Lionel Messi, u rangialehkai ka ri Argentina, u la ai ka burom kaba khraw ia u Andres Iniesta, u Rangialehkai ka Spain bad uba la pynbna ialade ba un shongthait noh na ka kam ialehkai phutbol.
U Andres Iniesta bad u Lionel Messi, ki dei kiba la lehkai lang bad neh slem bha ha ka FC Barcelona, ha kaba ha ka jingialehkai Andres Iniesta bad Lionel Messi ha ka FC Barcelona, ka la pynlong ia katei ka Klob ba kan khur ia shibun ki khusnam bad kum ka kynhun nongjop, la ka long ha ka UEFA Champions League, ha ka La Liga bad ha ka FIFA Club World Cup ruh kumjuh.
Lah ruh ban pynkynmaw, ba u Andres Iniesta, u dei uba la don bynta ha ka World Cup 2010 bad uba la dei ruh u nongthep ia ka kol, kaba la pynlong syndon ia ka Spain ba kan rah ia ka World Cup 2010, hadien ba ka la lah ban pynliem noh ia ka Netherlands da 1-0, ha ka jingiakhun kaba la poi sha ka Extra Time.
