Naba leit thied JCB ha Guwahati, shah rah bor 3 ngut ki rangbah na Ri Bhoi ha ki runar

Nongpoh, June 5: Ki 3 ngut ki rangbah briew na Ri Bhoi District ki la shah rah bor mynta ka sngi ha ki runar na Guwahati, katba ki dang thmu ban leit thied ïa ka Puhshilulm (JCB) bad kine ki rangbah ki la mih na Ri Bhoi ha ka por 7 baje mynstep ban leit thied ïa katei ka Puhshilum na Guwhati.
Ïa kane ka jingjia la tip hadien ba ka Lok jong uwei na u Rangbah ka Kong Kirit Dohtdong kaba dei na ka shnong Mawlang ka la pyntip sha ki bor pulit hadien ba ka la ioh jingtip ba u Lok jongka ryngkat ki ar ngut ki la shah rah bor ha ki runar.
Kitei ki 3 ngut kiba la shah rah bor ki kynthup ïa u Bah Iohborlang Kharsati uba dei u kurim ka Kong Kirit Dohtdong, nangta kiba synran ïa u ban leit thied ïa katei ka Puhshilum ki kynthup ïa u Kostarwell Jtyrwa bad u Samsul Ali.
Kumba la ïathuh da ka Kong Kirit Dohtdong ba la pyntip sha ki bor Pulit, la ong ba ka la ioh pdiang ïa ka khubor lyngba ka Mobile Phone lyngba u number 6009440991 ba la pyntip ba u Lok jongka ryngkat kitei ki 2 ngut ki rangbah ki la shah rah bor ha ki runar bad ruh ki la dawa pisa haduh T. 7 lak ban pynlait ïa ki.
La ïathuh ruh hadien ba la ioh pdiang ïa kane ka jingujor, ki Pulit ka Ri Bhoi mynta ka sngi ha ka por 9.30 baje mynstep ki la phah ïa ki kynhun pulit ban leit sha Nalbari District Assam da kaba ki la ioh jingtip kaba biang ïa ka jaka ba la rah da kitei ki runar. Hynrei dei ha ka por 3.30 janmiet ki la ioh jingtip ba ki PUlit ka Assam ki la ioh kem ïa ki ar ngut ba kynthup ïa u Samsul Hogue bad u Abdul Aziz na Kaplabori Nalbari Assam. La ong ruh dei lyngba ka jingioh kem ïa kine ki ar ngut kiba ki la pyndonkam da kawei ka Kali Ignis kaba rong Blue bad kaba khlem pat da dep ban leh ïa ka registration.
Katkum ka khubor ba la pyntip da ki Pulit ka Ri Bhoi, la ong ba la pynlong ïa ka jingtohkit hadien ba la ioh kem ïa kine ki ar ngut kiba la phla ba ki la leh ïa katei ka kam rah bor ïa kitei ki rangbah ban dawa pisa jubor bad dei ruh lyngba ka jingbuddien hadien ba la ioh kem ïa kitei ki 2 ngut la ioh jingtip ba kitei kiwei pat ki runar ki la don sha Tihu National Highway.
Shuh shuh, halor kane ka jingjia lyngba ka jingtrei lang ki Pulit na Assam bad Meghalaya ki pulit ka Tinhu Police Station ki la shim khia ban buddien ïa kiwei pat ki runar ba don kti ha katei ka kam rah bor bad ba la ioh jingtip ruh ba kitei ki rangbah ki la lait na ka kti kitei ki runar da kaba ki la kynthih jubor napoh ka Kali kaba dei hadien ba kitei ki runar ki la shah pynap shrip ha ki Pulit ka Tihu.
Shuh shuh, la ong ruh ba ïa kitei ki rangbah la shimti noh da ki Pulit ka Tihu ban leit ïalam sha Police station bad ha kane ka jingpynap shritp ki Pulit ka Tihu kitei ki runar ka la ioh phet jubor na kane ka jingpynap shrip ki Pulit ka Tihu. Ka jingtohkit bad ka jingbuddien ban ioh kem ïa kitei ki runar ka dang ïaid shakhmat da ki Pulit ka Assam na Tihu Police Station.