Nongpoh, Jylliew 25: Kawei ka longkmie kaba don 6 ngut ki khun ha ka shnong Umlangkraw, kaba hap ha Umroi Constituency, ka la ioh ban pdiang ia ka iing ba shong ban sah ba paka bad kata ka dei na ka jingpynshna sngewbha da u Damanbait Lamare, MLA Umroi.
Katei ka longkmie kaba la ioh ban pdiang ia katei ka iing ba la pynshna sngewbha da u MLA, ka dei kaba la tip kum ka Kong Metilda Rapsang, ha kaba mynshwa ki shong ki sah ha kawei ka iing trep bad kaba la pynjynjar sohsat eh ba kin iashong iasah shi khun shi kti hapoh katei ka iing.
Haba la tip ia katei ka jingeh, kaba la kynduh da katei ka longkmie lem bad ki khun ki kti jong ka, u Damanbait Lamare, u la pynshna sngewbha noh da ka iing kaba la kham bit kham biang bad uba la ioh ban leit aiti noh hynnin ka sngi sha katei ka longkmie.
Ha katei ka sngi, ba u MLA Umroi, u la leit hi dalade ban aiti ia katei ka iing sha katei ka longkmie, la sakhi da ka jingdon u Drosing Nongrang, Rangbah Shnong Umlangkraw lem bad kiwei ki riew rangbah jong katei ka thain, ha kaba lyngba katei ka sngi, ki la lah ruh ban aiti da ki jingbam jingdih, khnang ba katei ka longkmie lem bad ki khun ki kti ha katei ka iing, ba kin ioh ban pyndonkam ha kaba bam ba dih.
Haba kren ha katei ka sngi, u Damanbait Lamare, u la ong ba kumba u la dep ban kular ha ka por ba u ialap Ilekshon, ba um don kano kano ka jingleh shilliang khmat bad ba un iarap kajuh ia baroh, kumta haduh mynta ruh um don kano kano ka mynsiem leh shilliang khmat iano iano ruh.
Kumba katei ka shnong ka dang don ha ka jingjynjar ha ka leit ka wan, namar ka jingbym pat biang bha ki lynti syngkien, kumta na ka liang u Damanbait, u la ai ka jingkular ba un sa leh shitom na bynta ban pynioh ia ka surok ba bha ha katei ka shnong, khnang ba kan pynsuk ha ka leit ka wan ki paidbah, u la bynrap.
Sa peit ruh
