Shillong, Jylliew 29: Da ka jingkyrmen ka Ryntih Football Club ryngkat ka kynhun ki Heprit mynta ka step ki la mih na Nongbah Shillong ban leit shim bynta sha ka International Iber Cup 2026 ka ban long ha ka Estoril (Lisbon) ha ka ri Portugal.
Kane ka lympung Iber Cup 2026 kan sdang naduh ka 29 tarik u Jylliew haduh ka 5 tarik u Naitung, ha kaba ki kynhun under-14 na ki ri bapher bapher ka pyrthei kin wan ban aireng bad ban shim bynta ha kane ka lympung ialehkai phutbol ki heprit.
Shuwa ba kane ka kynhun kan mih na ka jylla, la pynlong ia ka jingiakynduh lang ha Nongbah Shillong, ha kaba la don ryngkat u Myntri ka tnad Sports and Youth Affair U Bah Wailadmiki Shylla, uba la ai ka jingkyrkhu kyrdoh ryngkat ruh ka jingkyrshan na ka sorkar jylla halor ka jinglut jingsep jong kine ki heprit kiba la leit ban shim bynta ha katei ka International Iber Cup 2026.
Ha kane ka jingiakynduh lang, la don ryngkat lang ruh u Bah A.L Hek MLA ka Pynthor, ha kaba ma u ruh u la ai ka jingkyrkhu kyrdoh ia kane ka kynhun ba kan lah ban ialehkai bha bad ruh ka jingioh lad kine ki heprit ban leit shim bynta sha katei ka Iber Cup ka long shisha ka jingsarong bad khamtam ka burom ia ka jylla bad ka ri lada kane ka kynhun kan lah ban wan rah ia ka nam jop.
Na ka liang u Myntri ka tnad Sports and Youth Affairs u Bah Wailadmiki u la kyntu ruh ia kane ka kynhun ba kan ialehkai bha ha katei ka Iber Cup bad u khmih lynti ruh ba kane ka kynhun kan wan rah nam bad burom ia ka jylla bad ka ri India hi baroh kawei.
Na ka liang u CEO ka Ryntih Football Club u Bah Evarist Myrsing u la ai khublei kyrpang naduh u Myntri rangbah ka jylla u Conrad K. Sangma bad ruh ia u Bah Wailadmiki Shylla kum u Myntri ka tnad sports, namar dei lyngba ka jingkyrshan ka sorkar ba ka Ryntih Football Club ka ioh ia ka lad ban leit ialam ia kine ki heprit sha katei ka Iber Cup ban long ha ka ri Portugal.
Sa peit ruh
