Khliehriat, Jylliew 29: Ki ar tylli ki seng bhalang na Rilum Jaintia ba kynthup ia ka Jaintia Students’ Union (JSU) bad ka Jaintia National Council (JNC) mynta ka sngi ki la pynthikna ba kin kyrshan tyneh ia ki nongshong shnong ba hap ha ka Elaka Nongkhlieh, kaba dei hadien ba la don ka jingkynnoh ba ki don ki kynhun Runar (Mafia) kiba la byrngem byrsit ia ki nongshong shnong.
Haba kren sha lad pathai khubor, u General Secretary ka JSU u Bah Neilkee Mukhim u la ong ba ka seng ka la dep ban kynduh ia ki nongrep, ki trai jaka bad ki nongshong shnong ba hap ha ka Elaka Nongkhlieh khamtam ki nongshong shnong ka Daistong bad ki la ai mynsiem ruh iaki ba kim dei ban don ka jingtieng jingsyier wat la don kita ki kynhun runar kiba la byrngem byrsit ia ki.
U la ong ruh ba ka seng ka la ioh jingtip ba ki nongshong shnong ki don hapdeng ka jingtieng jingsyier, kaba dei hadien ba don ki kynhun Runar kiba la byrngem ia ki nongshong shnong.
U Bah Mukhim u la ong ba ka JSU bad ka JNC kin ia trei lang ban kyrshan ia ki nongshong shnong ba kin ia tylli ba iakhun ia laka jong ka hok bad na ka liang kine ki ar seng kin don ryngkat bad ki paidbah ba kin nym ailad ban don kum kitei ki jingshah byrngem pyrshah ia ki nong shong shnong.
Shuh shuh, u la ong ruh ba ka JSU bad JNC kin don ryngkat bad ki paidbah ba kim dei ban sheptieng bad ha kawei ka bynta ki hap ban ia tylli bad ai ruh ba kane kan poi sha ka shkor jong ka sorkar ba kum ki nongshong shnong kim dei ban shah mad kum kine ki jingbyrngem ha kita ki kynhun runar, u la bynrap.
Pule ruh: Bteng U MLA Mawryngkneng Bam Sam Ia Ki Skhim Kam Pynroi Sha Ki Paidbah Ka Constituency
Ha kawei ka bynta, la sngewthuh ba kane ka jingshah byrngem ki nongshong shnong khamtam ki nongshong shnong ka Daistong ha East Jaintia Hills, ka lah ban dei na ka Project jong ka Shree Cement Limited kaba thmu ban buh ia ka Cement plant ha kaba ha kine ki khyndiat bnai la don ki kynhun ba pyrshah bad ki kynhun kiba pdiang bad ba la mih ruh ka huri hura ha katei ka thain na ka jingthmu ban wan rah ia ka Cement Plant.
Peit ruh:
