Nongpoh, Naitung 16: Ha ka jingjia iasyllad kali kaba la jia mynta ka step ha ka por kumba 9 baje eiei ha surokbah NH-6 bad kaba hap hapoh u pud u sam ka shnong Mawdiangum, Nongpoh, lai ngut kiba shong ha kawei ka Auto Rickshaw ba kynthup ia u Driver, ki la mynsaw jur bad kata ka dei hadien ba ka Auto Rickshaw ba ki shong kaba don ia u number ML 10-C-6619, ka la shah syllad ha kawei ka kali Maruti Fronx kaba ym pat don number satia.
Katei ka jingjia, ka la jia ha surok kaba don ha ka liang ban hiar sha Guwahati, ha kaba katkum ka jingiathuh da ki paidbah kiba la sakhi ia katei ka jingjia, ki la ong ba ka daw kaba la pynlong ia katei ka jingjia, ka dei namar ka jingpynher stet u nongniah katei ka Maruti Fronx.
Hadien ba la jia katei ka jingshah syllad ia katei ka Auto Rickshaw, u nongniah ka Maruti Fronx, u la pyrshang ban phet na ka jaka, hynrei u khlem lah namar ka tyre jong ka kali ka la pait.
Kiba la mynsaw ha katei ka jingjia ki kynthup ia u Dribar u Bokanto Maiong, 34 snem ka rta bad 2 ngut pat ka Kong Melinda Syiem, 47 snem ka rta bad u Shanlang Lyngdoh Nonglait 28 snem ka rta na ka Shnong Saiden bad ki 5 ngut kiba shong ha ka Maruti Fronx pat kim shym la mynsaw satia.
Peit ruh:
Haba la tip ia katei ka jingjia, ki Pulit ka Nongpoh Police Station, ki la poi mardor sha katei ka jaka ban pynlong ïa ka jingtohkit bad ban leh ïa kaba donkam katkum ka aiñ bad Ïa kiba la mynsaw la pynkit noh sha Civil Hospital Nongpoh ban ïoh ia ki jingïarap bad jingsumar.
