Shillong, Naitung 21: U nongialam ka Meghalaya Bharatiya Janata Party (BJP) u badei ruh u MLA ka Pynthorumkhrah constituency u Bah AL Hek ula pynpaw ka jingsngewkhia halor ka jinglait tuh ki kot jingkylli eksamin NEET daka ba ong ba kane ka ktah iaka lawei ki samla pule.
Ia kane u Bah Hek ula kren haba jubab iaka jingkylli halor ka jingiai bteng ki samla pule ban iakhih ha Jantar Mantar New Delhi kiba la dawa hiar shuki u Myntri ka tnat Pule Puthi ka Sorkar Pdeng bad ban wanrah ka jingkylla haka rukom treikam ka tnat.
Haba kren shaki lad pathai khubor u Bah Hek ula ong ba um kwah ban tip ba ka jingiakhih bala pynlong daka Cockroach Janata Party (CJP) ka don jingiadei ne em bad kiwei ki sengsain pyrthei ne kynhun hynrei ula pynpaw ba kane ka jingiakhih kadei namar ba ki samla pule kila shah ktah namar ba lait tuh ki kot jingkylli eksamin NEET.
“Kane ka ktah beit iaki samla pule ka ri baroh kawei namar kata kadei ka kamram jong ka Sorkar ban pynthikna ban pynbeit iaki kynrum kynram ne ki jingeh ba ki samla pule ki iakynduh” la ong u Bah Hek.
U Bah Hek ula ban jur iaka jingdonkam ban pynlong daka jingtohkit ba bniah halor ka jingkynnoh lait tuh ki kot jingkylli eksamin NEET khnang ban shai lut kiei kiei baroh.
Haba iadei bad ka jingdawa hiar shuki u Myntri ka tnat Pule Puthi ka Sorkar Pdeng, u nongialam ka Meghalaya BJP u Bah AL Hek ula ong “Ki hap ban bishar bniah shwa kaei ka daw kaba pynlong ban mih ki jingkynnoh ba lait tuh ki kot jingkylli eksamin NEET bad hadien bala pynshisha ia kiei kiei baroh, nga tharai ka Sorkar Pdeng kan sa shim iaki sienjam ba kongsan”.
U Bah Hek ula ong ba u ieh haka jingstad ka Sorkar Pdeng ban shim iaki sienjam ba donkam haba iadei bad ka jingiakhih kaba dang iai bteng ha Jantar Mantar New Delhi.
Sa peit ruh
