Shillong, Naitung 31: Ka jingmih ki kynrum ki kynram bad ki huri hura kumba la paw pyrthei bad ba la pynpaw ruh da kiba bun balang sha ki lad pathai khubor pyrshah ia ka Public Hearing ka Shree Cement ha Lum Syrman, kane ka jingbym pyniaid ia ka Public hearing katkum ka lynti ne ka hok u paidbah ka la ktah bad rung ruh wat ia ki jingmut jingpyrkhat ki nongialam ka KSU ha kaba mynta ka janmiet u Preisident ba rangbah ka seng u Samla Raymond Kharjana u la hap ban kren sha ki lad pathai khubor ban pynpaw halor ki nongrim jong ka seng pyrshah ia kane ka public Hearing.
Haba kren sha ki lad pathai khubor mynta ka janmiet, u Samla Raymon Kharjana kum u nongialam ba rangbah ka seng u la kynthoh ba kane ka jingpynlong ia ka public hearing ka Shree Cement kam dei shuh kaba la leh katkum kata ka hok synshar paidbah (Democracy) bad ka dei kaba pynbeit lypa (Pre Plan) naduh ka sorkar jylal, ka bor synshar District, ka Elaka, ki bor Pulit, ka KHADC bad ka Company Shree Cement, namar kito kiba pyrshah ia kane ka Public Hearing kim ioh lad satia ban shim bynta ban pynpaw ia ka jingsngew ne ka nongrim jongki.
“Ka KSU kan nym lah ban pdiang ia kum kane ka Public Hearing kaba la shu thom da ka bor bad khlem da leh katkum ka synshar paidbah, ha kaba tang kita kiba kyrshan ki ioh lad ban shim bynta bad kito ki bym kyrshan pat kim ioh lad satia” ong u Samla Jana, bad bynrap ruh da kaba buh jingkylli shaei kita ki bor synshar District, ki bor Pulit bad ka Meghalaya State Pollution Control Board kiba la pyniaid beit ia ka Public Hearing namar nadudh hynnin ka miet la don ka jingsiat tear gas, ka jingpynjulor ia ki Kali, ka jingkawang maw da ka kynhun ba pyrshah bad kaba kham ktah tang namar ka Public Hearing ka la ktah ia kiba pang ba shitom ba ki la tih ia ka surok” u la bynrap.
Haba kita ki bor sorkar ki don ha kane ka jingpynlong ia ka Public Hearing, mano ba aibor ban tih ia ka thliew ha ka surok paidbah bad kane ka paw ba ka dei ka jingbym kitkhlieh ka bor symnshar District, ki bor pulit bad wat ka Pollution Board, ong u Samla Jana.
U la bynrap ruh da kaba ong, ba ka KSU kan nym pdiang ia kane ka Public Hearing ka Shree Cement, namar kita ki nongshong shnog kiba pyrshah ia kane ka Public Hearing kim ioh ban shim bynta bad lada dei shisha ka Public hearing ki dei ban iaid da ka lynti kaba beit ban ailad lang na baroh arliang mamla, hynrei kumba long mynta ka sngi pat kiba pyrshah kim ioh lad bad tang kito kiba kyrshan ki ioh shim bynta ha ka public hearing, u la bynrap.
Peit ruh:
Namarkata, ka seng ka dawa ia ka sorkar jylla, ki bor district, ki bor pulit, ka Pollution Board ba ki hap ban shim ia ka jingkitkhlieh bad lada kim shim khia ka seng ka hap ban pyrkhat ban shim da kiwei pat ki sienjam, namar kum ka seng kam kwah ban don ka jingthombor bad dei ba leh da ka hok kum kata ka ri sysnhar paidbah (Democracy), la bynrap une heh nongialam ka KSU.
