Shillong, Naitung 31: Na ka daw ka jingleh mynthi bad ka jingleh mutlop ka sorkar jylla halor ki 10 tylli ki mat ba la wan rah da ka party VPP kiba dei kita ki mat kiba ktah ia u paidbah, ka VPP party ka la rai ban bteng biang ban leit tur bad ker tawiar ia ka Secretariat ha Nongbah Shillong ban pynpaw ia ka jingpyrshah kaba jur halor kine ki kam leh mynthi ka sorkar jylla.
Kane ka jingleit tur ne ker tawiar ka VPP ia ka Secretariat kan long ha ka 6 tarik u Nailar 2026 bad ia kane la pynbna ruh da u President ba rangbah ka VPP bad uba dei ruh u MLA ka Nongkrem u Bah Ardent Miller Basaiawmoit, kaba dei hadien ruh ba ki la shim rai ha ka executive Committee ka party kaba long hynnin ka sngi palei.
Haba ia kren bad sha ki lad pathai khubor, u Bah Ardent Millar Basaiawmoit u la ong ba kum ka party ka shim ia kane ka rai ban leit tur ne ker tawiar iaka Secretariat ka long ban pyrshah jur ia ka jingleh mynthi bad leh mutlop ka sorkar ia kitei ki 10 tylli ki mat ba la wan rah da ka party bad kiba dei ruh ki mat kiba ktah ia ki paidbah ka jylla.
U la pynshai ruh ba kane ka jingleit tur sha Secretariat kam shym mut ban leit thom da ka bor kaba ktah ia ka shongsuk shongsain u paidbah, hynrei ka jingleit ker tawiar ia ka Secretariat kan dei da ka lynti kaba jai jai ban pynpaw ia ka jingsngew u paidbah babun balang, uba la lynga pisa bad bitar na ka jingleh mynthi jong ka sorkar jylla.
U la ong ruh ki mat ba ka party ka la iakhun ka long halor u Lumpondeng ba ka sorkar kam dei ban shu kren tang ka ktien ba la pynsangeh bad dei ban ai da ka jingthoh ban shai u paidbah, ka jingkhuid jingsuba ha ka thungkam thungjam ki samla la ka dei ha DSC ne UPSC ba ka seng ka la ujor ruh sha u Chief Secretary ba ka don ka jingleh thok ha ka jingthungkam DSC ha West Jaintia Hills. Kiwei ki mat ki kynthup ruh ban pynsangeh ia ki Karkhana Coke bad Cement Plant, ban pynneh pynsah ia ki khyndew ki shyiap u paidbah, bad ruh ban tehlakam ia ki jingwan poi ki mynder khlem ka jingpeit pyrman lem bad kiwei kiwe ki mat.
Shuh shuh, u Bah Ardent Miller Basaiawmoit u la kren halor shibun ki jingeh kynthup naduh ka jingktah ka khang tih dewiong, ki pud ki sam , ka jingkynrei u drok bad kiwei kiwe ki mat kiba ktah ia ki paidbah bad halor kane ka jingleh mynthi ka sorkar ka party ka shim ia kane ka rai ban iakhih da kaba jai jai ban leit ker tawiar ia ka Secretary ban pynpaw ia ka jingpyrsha ba ka sorkar kam lah ban leh ei ei halor kitei mat ba la wan rah da ka Party VPP, u la bynrap.
Peit ruh:
Na ka liang u Bah Ardent u la kren ruh wat shaphang ka Public Hearing ka Shree Cement ba la kynnoh ba la ba la shu leh donbor bad kam dei kaba iaid katkum ka lynti jong kata ka ri sysnhar paidbah.
