Nongpoh, Nailar 25: Ha ka jingjia aksiden kali kaba la jia mynta ka sngi ha surokbah NH-6 bad kaba hap ha shnong Umran Dairy, Ri Bhoi, kawei ka kali Maruti Alto 800 kaba don ia u number ML-05-K-8058, kaba la niah da u Graphitestone Lyngdoh, ka la julor bad kata ka dei hadien ba ka la shah tynrah ha kawei ka kali Tata Mobile kaba don ia u number AS-01-TC-9069 bad kaba la niah da u Shri Bappa Das, na ka jylla Assam.
Katei ka jingjia aksiden kali, ka la jia ha ka por 12:15 baje eiei shiteng sngi ha Umran Dairy, ha kaba katei ka Tata Mobile ka dei kaba don ha ka lynti ban kiew sha Shillong, hynrei haba la poi ha katei ka jaka, ka la leit ban tynrah beit nadien jong katei ka Maruti Alto 800, kaba la pynlong ruh ia katei ka Maruti Alto 800, ba kan leit rung bad sahkut ha ki bynta ba shadien jong kawei pat ka Trok kit Umphniang kaba don ia u number ML-05-AE-3477 bad kaba la niah da u Javan Kalita.
Tang mar ia tip halor katei ka jingjia, ki Pulit na Umsning Police Station, ki la leit mar mar sha katei ka jaka, ban pynlong ia ka jingtohkit, ha kaba ki la rah noh ia Tata Mobile bad Alto 800 sha Thanad, katba ia katei ka trok kit Umphniang, ki la buh noh ha Petrol Pump kiba don ha Umran Dairy.
Sa peit ruh
